Thlai thar pali lei tura intiam zingah Hmunphiah hring a tello tih CM in a sawi

Chief Minister Lalduhoma'n thlai thar pali lei tura mipui-a an intiam zingah Hmunphiah hring a tel lo tih Assembly House hrilhin, Land Resources, Soil & Water Conservation Minister Lalthansanga'n Hmunphiah chingtuten a hralhna kawngah harsatna an tawk tih sawrkarin a hria tih House a hrilh bawk.

Nimin-a Mizoram Legislative Assembly Budget Session-a Hmunphiah lei chungchanga harsatna awm a sawifiahna ah Chief Minister Lalduhoma chuan, thlai thar pali (4) lei turin an intiam thu leh a rate pawh mipuiah an puan thu sawiin, hetah hian Hmunphiah hring an telh lo hrim hrim thu leh, an telh ngai dawn lo tih a sawi a, thlai thar lei chungchang chu Budget Session zawh Financial Year thar atanga an tih tura an puan a nih thu a sawi bawk. Chief Minister chuan thuneihna an chan hlim khan sawrkar sum hmanbang ningnawi an hmuh thu leh ‘Thlai thar lei nan hmang hlauh teh ang’ an ti tih sawiin, chu chuan thlai thar 4 leina tur an puang tih a sawi a, tlai thar dang pathum chu an rate aia sang leitu an awm avangin buaipui a ngai lova, pawisa pawh sen a ngai lo a, Hmunphiah pawh hetianga tih an tum a, sawrkar rate anga lei duh RR Associate ten lei mai tura an ngaih laiin an rin aia an lo chet theih loh thu leh hnathawktu an lo neih tawk loh avangin sawrkar beisei an phak lova, hei hi sawrkar chetsualna chhan ber pawh a nih thu a sawi a. Hei vang hian ‘Mahni buai buaiin lo buaipui mai rawh u’ an tih thu a sawi bawk.

Chief Minister Lalduhoma chuan Support Price pek tur sum nei mah se, Hmunphiah thartu ten an lo hralh nual tawh avang leh chhinchhiah awm lova hmun tinah Society din a ni bawk si loh avangin Support Price pe turin a ngaihna a awm tawh lo tih pawh a sawi a, Hmunphiah chingtu thenkhat leh a leitute Advance-a pawisa lo inpe lawk te an awm avangin loh theih lohin an hralh a ngaih thu pawh sawiin, Hmunphiah lei tura hnamdang lo lut tur lo dang pawl an awm niin a sawi a, hei vang hian hnamdang te hi an lut tha ngam ta lo nia a lan thu leh hei hian an buaina a belhchhah a tih a sawi a. Royalty chungchang pawh Chief Minister chuan sawiin, Hmunphiah chingtute chu eizawnan ngelnghet la nei lo an ni a, ‘Chhiah chawi tlak an ni lo e’ tiin Tax Holiday engemaw chen an pek thu a sawi a, Transit Pass pawh a thlawna kaltir duh hle mah se, Vairengte thlanglam ah a tlang theih loh avangin loh theih lohin a hniam thei ang berin an la tih a sawi bawk.

Nimin-a Assembly zawhna leh chhanna hunah Opposition Leader Lalchhandama Ralte zawhna kal zelah Hmunphiah chingtuten a hralhna kawngah harsatna an tawk tih sawrkarin a hria tih Land Resources, Soil & Water Conservation Minister Lalthansanga chuan a sawi a. Kuminah Hmunphiah lei tura lo kal an awm loh thu leh RR Associate chu an biakpawh theih awmchhun a nih thu sawiin, inremna ziak lovin inhriatthiam tawnnaa kalpui a nih thu leh sawrkar rate bituk aia hniam lova lei phalsak mai an nih thu a sawi a, Hmunphiah lei duh dang an lo kal dawn pawhin an rawn lut thei ang tih a nih thu Minister chuan a sawi bawk.

Hmunphiah lei chungchang ah sawrkar in theihtawp a chhuah zui thu pawh Minister chuan sawiin, tun dinhmunah Tlabung lamah Taj Company in hma an lak thu leh Mamit District-a Dampa-ah Gala Company te an lut tan a, RR Associate in hmar tlangdung lamah an lei mek thung tih a sawi a. Sawrkarin kum 2024 chhung atan bik Hmunphiah ro leina rate Grade 'A' kg khat Rs. 100/- aia hniam lo leh Grade 'B' kg khat Rs. 80/- aia hniam lo turin a bituk thu a sawi a, hetihlai hian a hringa leina tur rate erawh a bituk lo thung tih sawiin, Hmunphiah hring ti ro turin hun leh tha tam tak sen buai a ngaih avangin sawrkar tan a hring a lei a remchang rih lova, hemi avang hian a hring-a leina rate pawh fix a ni lo tih a sawi a ni.