Serchhip-ah Mizo infiamna hmanga inelna neih tan a ni

Serchhip Sub-Hqrs. YMA huamchhunga YMA Branch hrang hrangte Mizo Infiamna chi hrang hrang hmanga an inelna tur, ‘Aizawl DD Mizoram Indigenous Games 2024 (Inter-Branch YMA Competition, Serchhip District)’ chu nimin khan Serchhip P&E Veng-a Leisekawt Mual-ah neih tan niin Vawiin hian zawhfel a ni ang.

Mizo infiamna hmanga inelna hi Serchhip Sub-Hqrs. YMA President Kawlthuama chuan khuallian nia hawngin Mizo infiamna chi hrang hrangte chu kan Culture-a bet tlat a ni tih a sawi a, Mizo ten infiamna kan neih hrang hrangte chu kan State chhung leh India ramchhung mai ni lo, khawvel huap-a phochhuah kan thiam a pawimawh thu a sawi a. He inelna a tel tur Serchhip Sub-Hqrs. YMA huamchhunga YMA Branch hrang hrang te chu infiammi rilru thianghlim tak pu chunga theihtawp chhuah tur leh Mizo tlawmngaihna leh aia upa zahna te vawngnung chunga a chak ber nih tum turin a chah a ni.

Nimin-a tan tak ‘Aizawl DD Mizoram Indigenous Games 2024 (Inter-Branch YMA Competition, Serchhip District)’ ah hian Serchhip Sub-Hqrs. YMA huamchhunga YMA Branch 12 atangin infiammi mi 150 vel an tel a, heng infiammi te hi Mizo Infiamna chi hrang hrang- Mipa tan Insuknawr, Inbuan, Insaihruipawh leh In arpa thai bakah Hmeichhe tan Inkawibah-ah te inelna an nei a, Vawiin hian inelna hi chhun-zawm lehin zawhfel tur a ni dawn a ni.

He inelna-ah hian Item hrang hrangah lawmman siam tur niin a tel zawng zawng YMA Branch te tan lawmman siam a ni dawn bawk a, inelna hi District hrang hrangah neih tura ruahman niin District tina a titha te hian Aizawl-ah inelna hi an nei leh dawn bawk a ni. He intihsiakna hi DD Aizawl leh Mizoram Indigenous Games Association (MIGA) tangkawp buatsaih niin inelna neih zawng zawng hi DD Aizawl-a tihchhuah leh tura ruahman a ni bawk.