Sawrkar inrelbawlna ah hman tur zaa 82.97 tling

Kum 2024-2205 Mizoram sawrkar Budget pharh takah Budget pumpui atangin hmasawnna hna thar thawhna tur, Capital Expenditure chu zaa 17.03 a ni a, sawrkar inrelbawlna senso Revenue Expenditure chu zaa 82.97 ni tura chhut a ni.

Capital Expenditure hi mipui tana hmasawnna ruhrel hrang hrang dinna tur a ni a, hemi atan sum ruahman chu Mizoram sawrkar Budget thar cheng vbc. 14,412.12 atangin cheng vbc. 2,455.08 a ni a, hei hi budget pumpui atanga zaa 17.03 a ni a. Sawrkar kum kal mek 2023-24 ah hian Capital Expenditure atan sum dah chu cheng vbc. 3,141.19 a ni a, hei hi budget pumpui atangin zaa 21.90 a ni a, Sawrkar kum thar atana Capital Expenditure atan sum ruahman hi kum kal meka sum ruahman aiin cheng vbc. 686.11 zetin a tlem zawk a ni.

Sawrkar hnathawk hlawh leh pension senso, zirna, infiamna leh kawngpui enkawlna ang chi te leh sawrkar inrelbawlna chi hrang hranga sum hman tur chu Revenue Expenditure tia sawi a ni thung a, hemi atana hman tur hi cheng vbc.11,957.04 dah niin, budget pumpui atanga zaa 82.97 a ni a. Sawrkar kum kal mekah Revenue Expenditure-ah hian cheng vbc. 11,200.76 dah niin Budget pumpui atangin zaa 78.10 a ni a. Sawrkar kum thara Revenue Expenditure-a sum dah hi kum kal meka sum ruahman aiin cheng vbc. 888.28 in a tam zawk a, a punna hi zaa 6.75 ni. Revenue Expenditure-a sum dah tam a nih chhan chu Sawrkar hnathawk hlawh leh Pension atana sum senso a tam vang te, Sawrkar inenkawlna senso hrang hrang a pun hret hret vang a ni tih Chief Minister chuan a sawi.