Assembly House-ah ‘The Mizoram Water Resources (Management and Regulation) Bill’ pass a ni

Mizoram Legislative Assembly Session neih mekah ‘The Mizoram Water Resources (Management and Regulation) Bill, 2024’ chu sawiho a nih hnuah pass a ni.

Niminpiah-a Mizoram Legislative Assembly thutkhawm neih ah Irrigation and Water Resources Department changtu Minister PC. Vanlalruata chuan ‘The Mizoram Water Resources (Management and Regulation) Bill, 2024’ hi pulutin mihring lo pung zelah Mizoram-a tuihna neih te mumal taka enkawl a pawimawh thu a sawi a, Khawvel thang zelah tui enkawlna felfai tak a awmloh chuan nakin ah harsatna awm palh thei a ni tih sawiin, Bill chu Department tin tan thil pawimawh a nih thu a sawi a, a enkawlna tur Council sang berah Chief Minister Chairman-na hnuai a ni dawn tih sawiin, khawtlang hmasawn zel nan Bill tangkai tak anih a beisei tih a sawi a ni.

Sawihona ah hian Member 8 in sawiin House Leader Lalduhoma chuan Sawrkar hmasa tih ni mahse thil tha a nih phawt chuan chhawm zel chu ram tan a tha zawk tih a sawi a, Bill an sawiho mekah a hmalatu chu sawrkar kalta MNF Sawrkar a ni tih sawiin, Bill tha tak, mi tin tana pawimawh a ni tih a sawi bawk. Chief Minister chuan House a Bill chhawpchhuah kawngah Department ten zirchian a pawimawh tih sawiin, Dan anga hman anih dawn chuan dik famkim lo siam that ngai tam tak awm thin chu Department inenfiah nan hmang se a duh tih a sawi bawk.

Opposition Leader Lalchhandama Ralte chuan Bill chu Mizoram kal zel tura thil pawimawh a ni tih sawii, Khawvel sik leh sa inthlak avanga tui hna kangchat hmun tam taka awm te chu thangthar lo awm zel tur tan a pawi dawn tih a sawi a, mahni duhthua leihnuaia tuihna verh te pawh dan hnuaiah vek a ni thei tur chu tha a tih thu sawiin, sawrkarin a hlawkna an tel ve theihna turin awmze nei zawka kal a pawimawh tih a sawi a, Bill tha tak niin pass ni mahse a hman dan a pawimawh zawk tih pawh sawiin, dan tha an pass chu mipuiten an hriat theihna turin zirtir a pawimawh thu leh thangthar lokal zel tur ten an hman tangkai theihna turin Bill chu a thlawp thu a sawi bawk a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni