RG Stadium-a Artificial Turf phah MSSC in hriatpui lo

Nikum-a Rajiv Gandhi Stadium, Mualpui-a Artificial Turf phah thara sum sen zat Mizoram State Sports Council in a hriatpui lo tih Sports Minister Lalnghinglova Hmar chuan Assembly House a hrilh.

Nimin-a Assembly Session-ah Lawngtlai West bialtu MLA C. Ngunlianchunga zawhna leh zawhbelhna a chhanna ah Sports Minister chuan RG Stadium, Mualpui-a Artificial Turf phah thar chu MSSC kaltlanga phah a ni lova, sanction zat pawh hriat a nih loh thu te, he hna thawktu tur thlanna Tender chhuah a ni lova, Open Tender nge Restricted Tender a kalpui tih pawh hriat a nih loh thu sawiin, hnathawh tan hun hriat a nih loh bakah Official-in Contractor pawh hriat a nih loh thu a sawi a, Administrative approval emaw, Tender emaw, Expenditure sanction emaw sawrkar ang chuan a awm loh thu a sawi bawk.

Hemi chungchang hi Sports Minister hlui leh MNF MLA ni mek Robert Romawia Royte chuan sawifiahin, RG Stadium-a Phullem phah chungchangah thil fello a awm lo ni lovin, dan danga tih tur tih loh a awm thu a sawi a. Robert Romawia Royte chuan RG Stadium-a phullem phah chu a chhe tawh a, I-League leh National Level infiamna atan hman tlak a nih tawh loh avangin Zobawk-a Phullem phah tura dah, Court-in hnathawh chhunzawm a phal loh avanga dah rih chu an hmang rih a, sawrkar atangin lehkha fel tak siamin Director chu bawhzui zel tura tih a ni tih a sawi bawk.

Sports Minister chuan Lawngtlai Vengpui YLA Field siam chu zawh ala nih loh thu a sawi a, kumin July ni 11-a thawh zawh tura tih nih thu sawiin, hna hi Decor India, Guwahati a miten an thawk tih a sawi a, Work Order amount chu cheng nuai 917.77 a nih thu leh Physical achievement zaa 90 leh Financial achievement pawh cheng nuai 871.73 a nih thu a sawi.

Sports Minister Lalnghinglova Hmar chuan, sawrkarin Sports Association te tihchangtlun a infiammite hmasawnna lam chu a kalpui tum dan a nih thu a sawi a, mimal-in Incentive Cash Award an dawn ang deuhin Association titha te hnenah lawmman pek theih dan tur pawh ruahman tum a nih thu te, inelna tam zawk buatsaih tum a nih thu leh hemi lamah hian rilru sawrbing pawh an tum thu te a sawi bawk.