North Vanlaiphai tana tui lak hna thawh mek enfiah

North Vanlaiphai khaw mipui tana tui thiang-hlim in tur lakna tura hnathawh kal lai mek, North Vanlaiphai Water Supply Scheme, Rawleihlawn Pumping chu tunhnai khan North Vanlaiphai Village Council leh North Vanlaiphai Joint YMA hruaitu ten a hmunah kala enfiahin, hna thawh tawh te tha an tih thu an sawi a, hna chak leh tha zawka thawk zel turin an ngen.

North Vanlaiphai khaw tui lakna ‘Augmentation of North Vanlaiphai Water Supply Scheme’ hi North East Special Infrastructure Development Scheme (NESIDS) sum Rs.1,98,64,491.00 hmanga thawh niin, October ni 21, 2022 atanga thawh tan a ni a, kum hnih (2) chhunga zawhfel tura ruahman niin PHE Serchhip WATSAN Division hnuaia Contractor S.S. Construction, Chaltlang, Aizawl ten thawkin, tunah hian Tui Filter House, Sedimentation Tank, Pump House, Tuikhuah leh hna engemaw zat an thawk mek a, nikum lam khan Main Reservoir, Supply Reservoir leh Office Building bakah Quarters engemaw zat an thawk an thawk zo fel tawh bawk. 

He tuilak hi zawhfel anih chuan North Van-laiphai mipui ten hun engemawchen chhung tui thianghlim hnianghnarin an nei thei dawn a. North Vanlaiphai VC leh Joint YMA hruaitute chuan hnathawh an hmuh chinah tha an tih thu leh tun dinhmunah chuan ngaihthat thlak an tih thu sawiin, hna hi tha taka thawh anih theih nan a tul anga sawrkar leh contractor te thawhpui an inhuam reng thu an sawi bawk.