Mizoram State Day vawi 37-na lawmna Governor leh Chief Minister hovin neih a ni

Mizoram State Day vawi 37-na chu nimin khan Aizawl-a Vanapa Hall-ah neih a ni a, he hun hi Governor Dr. Hari Babu Kambhampati chuan khuallian nia hmanpuiin Chief Minister Lalduhoma chu Khualzahawm a ni.

Aizawl-a Mizoram State Day lawmna ah hian Governor chuan Zoram dung leh vanga khua leh tui te duhsakna chibai bukin, June 30, 2986-a Remna thuthlung ziah nih hnuin remna leh muanna awm nghalin State of Mizoram Act 1986 hmangin Mizoram chu State puitlingah hlankai a ni tih a sawi a. Mizoram chu State 23-na pek a ni mai lova, a bik taka a inrelbawlna atan India Danpui chhungah Article 371-G siam sak a nih thu leh Mizoram in State pamgngai angin Feb. 20, 1987 khan bul a tan tih a sawi bawk. Governor chuan Mizoram chuan hun rei tak buaina tuar mahse, remna leh muanna thuthlung ziah a nih hnua ah kum 37 lai chu India ramah State ralmuang ber a ni mek tih a sawi a. Mizoram-ah inthlanpui felfai, muanawm leh thianghlim taka kan hmachhawn thin te leh Assembly House chhungah MLA ten zahawm takin ro an rel thin chu entawn tlak a tih thu a sawi a. India ram hmundangah pawh Mizoram in House a kalpui dan te leh inthlanpui a hmachhawn thin dan te chu chhuang takin a sawi thin tih a sawi bawk.

Mizoram State Day lawmna hun hi Chief Secretary Dr. Renu Sharma IAS chuan kaihruaiin Chief Minister Lalduhoma chuan Mizoram in state a neih theihna kawnga hruaitu hmasa te hmalakna tlangpui sawiin, Article 371-G siam a lo nih dan te, he dan danglam bikna leh a nih phung te chiang takin a sawi a, Mizoram thil neih hlu ber leh kan himna kulhpui a nih thu a sawi bawk. State kan nih hma kum 25-ah khan State dang te chuan kawng tinrengah hmasawnna rahbi an lo tuk tawh tih Chief Minister chuan sawiin, hmasawnna ruhrel tha tak tak te an lo din tawh tih a sawi a. Kum 25 chhung hian mumal takin India ram chuan hmasawnna program, Five Year Plan vawi 5 lai a kalpui daih tawh a. Heng hun hlu tak, hmasawnna program tam tham tak kan hloh hnuah midang te hnuah bul kan tan vangin kalmuang thiang kan ni tawh lo a. Midang te umphak tur chuan midang te kal aia kal chak a ngai a, midang te aia thawh tam leh thawhrim a ngai zawk a tih a sawi bawk.

Mizoram hi square km 21,087 vel a zau a ni a, hmar lamah India State Assam, Manipur leh Tripura te nen a inri a, khawchhak lamah Myanmar leh khawthlang lamah Bangladesh nen International Boundary a intawm a ni. Kum 2011 Census-a a lan danin mihring awm zat hi 1,091,014 niin chhut dan hrang hrangin a tarlan ang chuan mihring awm zat hi nuai 13 vel ni a ngaih a ni a. Lok Sabha leh Rajya Sabha-ah seat khat ve ve neiin State Legislative Assembly-ah Seat 40 a awm a. Autonomous District Council pathum awmin tunah hian Mizoram hi District 11-ah then a ni a, Sub-Division 24 leh RD Block 28 a awm bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni