Bill lak tawh, hna la thawh loh 30 vel a awm

Mizoram-ah Contract hna kallai Bill lak tawh, a taka hna la thawh si loh 30 vel a awm.

Mizoram Legislative Assembly thutkhawm nimin-a neih ah Larsap thusawi chungchanga lawmthu sawina Motion sawihona tlangkawmna ah House Leader Lalduhoma chuan Mizoram-a hmasawnna hna hrang hrang thawhte chu dik leh tha taka kalpui a nih theih nan tunhmaa Mizorama la awm ngai lo Project Monitoring Committee din a nih thu a sawi a, an ni hian hna hrang hrang thawhte a hun taka zawh a nih theih nan hma an lak dawn bakah eirukna titlem tura hmalakna pawimawh tak a ni dawn tih a sawi a. Tunah hian Mizoram-ah Contract hna kal lai Bill lak tawh, a taka hna la thawh si loh 30 vel a awm tih sawiin, hetiang hi ZPM kaihhruai Sawrkar hnuaiah chuan a awm an remti tawh dawn lo tih a sawi a ni.

Chief Minister chuan Mizoram sum leh pai dinhmun a that loh avangin kum khat chhung chu insawhngheh kum, Year of Consolidation-ah an hmang dawn tih sawiin, mipuite pawhin sum an harsa tak tak tih chu hriatpui se a duh thu sawiin, kum khat chhung chu lo nghak a, an harsatna chu hrethiam turin a ngen a. Sum hmuh dan ngaihtuah tura sawrkar hmasain Resource Mobilisation Department a din chu Department puipui anga kalpui tul an tih loh vangin Committee anga kalpui a nih tak zawk thu leh theih chu ni se, Department awmsa thenkhat chu hmun khata siamrem tha an tih hial zawk thu a sawi a. Resource Mobilisation Committee hi Committee peng pathum-ah thensawm leh a ni dawn a, he Committee hian sum renchem lamah te, sawrkar sum hloh titlem turin Investment tul lo titawp tur leh Administrative Reform thleng-a hma an lak tur thu a sawi a ni.