Myanmar ramri hung tumna leh FMR tihtawp duhlohna Official Resolution House-ah pawm a ni

 Nimin-a Mizoram Legislative Assembly thutkhawm ah Home Minister K. Sapdanga Official Resolution putluh, Myanmar ramri hung tumna leh Free Movement Regime (FMR) tihtawp duhlohna te chu lungrual taka pass a ni.

Nimin-a Mizoram Legislative Assembly thutkhawm ah Home Minister K. Sapdanga chuan ‘Central Sawrkar-in Free Movement Regime (FMR) tihtawp a tum leh Myanmar nena kan inrina, Border Fencing kalpui a tum hi tha kan ti lova, ti lo turin kan ngen a ni. Dik lo taka British Sawrkar in Divide and Rule Policy hmanga Zofate min thendarh hi rorelna pakhat hnuaia kan kun leh theihna turin hma min lakpui zawk rawh se’ tih Official Resolution chu pulutin Free Movement Regime (FMR) tihtawp leh ramri hung chu mi tin ngaihven a nih thu leh, a tha zawng emaw, a tha lo zawng emaw zawnga sawi zui a hlawh rei viau thei tih a sawi a ni. Home Minister chuan Zofate hi khawchhak atanga tla thla, India, Bangladesh leh Myanmar ten ramri hrang neia an awm hmaa tlang hrang hrang bawh-a mahnia ro in rel a khawsa thin an nih thu sawiin, Mizote chu British-in an run a, an awp khan awpbeh an awlsam nan an thendarh a. Hnam khat na na chu British mi te zingah pawh rorelna pakhat hnuaia an awm duhsaktu pawh an awm ve tho a, kum 1892 January ni 20 khan Calcutta-ah Chin Luhai Conference koh a ni a, Zofate rorelna pakhai hnuaia an awmna turin thutlukna siam a ni a, hei hi a puitlin tak loh avangin Vawiin thlengin thendarhin an awm pha ta tih a sawi a ni.

Home Minister chuan, Mizote chu British-in hawsan hnu khan Myanmar, India leh Bangladesh-ah te thendarh an nih thu sawiin, Engtik ni-ah emaw chuan he barhluih ramri hi tihbo a la ni ang a, rorelna pakhat hnuaiah an la awm leh ngei ang tih beiseina nung nen an thlir mek lai a, barhlui ramri chawi nuna, tihngheh lehzualna tura hmalakna reng reng chu, Free Movement Regime tihtawp a ni emaw, ramri hung emaw pawh nise Zohnahthlakte tan thlawp theih a ni lo a, dodal zel chu hnam anga an mawhphurhna a ni tih a sawi a. Helna nasa tak tak India hmarchhaka a awm lai zawng zawnga ramri hung tum si lova, tuna hel pawl awm tawh mang loh hnua helna chhuanlama ramri hung tum chu chhuanlam awmze nei lo a nih thu sawiin Ramri a awmte inkalpawh theihna hlih hian Mizo hnam inpumkhatna a tichhe thei tih a sawi a. Chu bakah ramri a awmte tan ramri hung hi channa rapthlak tak leh an eizawnna tihchhiatna tur a ni tih a sawi a. India sawrkar hian British-in ramri a lo siam hi thiah a nih a, Mizo hnamte rorelna khat hnuai a an awm leh theihna tura khawvel dawhsan hrang hranga tanpuitu ni zawk turin sawrkar laipui chu a ngen a ni.

He Official Resolution sawihona hunah hian Member thahnem takin thu sawiin, Official Resolution hi an thlawp vek a, sawihona neih zawh a nih hnu hian Speaker Lalbiakzama kaihhruaiin House chuan lungrual takin he Official Resolution hi a pawm a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni