PHE hnenah Biodegester Technology hlan

Sawrkar laipui-a Defence Ministry hnuaia Defence Research & Development Organization (DRDO) chuan Zirtawpni tlai khan PHE Department kutah Biodigester Technology an hlan.
Septic Tank khat ve theilo an tih mai, Biodigester Technology hlanna puala inkhawm hi Aijal Club-ah PHE Secretary, Amjad Tak kaihhruaiin neih a ni a, he hunah hian Dr. SK. Dwivedi, Director Defence Research Laboratory (DRL) Tezpur, Dr. Vanlalhmuaka, Scientist ‘E’, DRL, Tezpur; Dr. S. Chatterjee, Scientist ‘E’, DRL, Tezpur; Joseph Lalramsanga, Director, UD&PA, Lalremsiama, Chief Engineer, PHED, Zone-I, C. Lallunghnema, Chief Engineer, PHE Department, Zone-II leh midangte an tel a ni.
Biodigester hi DRDO-in kum 25 chhung an zirchian hnua an hmuhchhuah a ni a. Biodigester-ah hian mihring ek eiraltu tur hrik, Anearobic Microbial Innoculum (AMI) a awm a, chu chuan mihring ek lo lut thar apiang an lo eiral zel avangin Septic Tank angin a khat ve dawn lo a ni. Biodigester Technology hi DRDO ta a nih avangin a duh apiangin lo siam ve ngawt phal a ni lova, DRDO-in Licence an pekte chauhvin an siamin an sa thei a ni. Tunah hian PHE Department chu Biodigester Technology hmang thei leh DRDO Licence neitu a lo ni ta a, biodigester duh leh mamawhte tan PHE Department hi a dawr theih tawh a ni.
Septic Tank aia Biodigester \hat zawkna hrang hrang a awm a, Biodigester-ah hian a hmangtu zat inang rengah Septic Tank aiin Ek khur a ngai zim zawk bakah Septic tank angin Soak pit a mamawh ve kher loh avangin nasa takin a siam man a tlawm zawk a. Biodigester-te hi an khah ve dawn tawh loh avangin Septic Tank anga sum tam tak senga paih ruah leh tihfai fo a ngai ve lo nia sawi niin, Biodigester-a ek eitu hrik te hi boruak mamawh lo chi an nih avangin boruak lut thei lova phui taka char vek a ni a. Biodigester a\anga tui lo luang chhuakte chu Septic Tank angin a rim chhe ve tawh lova, natna hrik a pai tam tawh lo bawk a, huan thlai chawm tura lei a luan chhuah tir nghal mai tlak a ni tawh a ni.

Comments

Chhiar Hlawhte