PWD in Kawnpui-Buichali kawng an sawifiah; MTA in naktuk a\anga rit phur tlan lo turin an ngen thung

Mizoram State PWD chuan Kawnpui-Khamrang-Buichali kawng chungchangah thuchhuah siamin Khuarel chhiatna kan tawh chu mipui in an hriatthiampui an beisei thu an sawi a. Hetihlai hian Mizoram Tipper Association (Driver's and Owner's) te chuan naktuk a\angin rit phur lirthei te chu helai kawng zawh lo turin an ngen thung.

Kawnpui-Khamrang-Buichali kawng chungchanga Mizoram State PWD thuchhuah chuan kum 2014-a Kawnpui-Khamrang–Buichali kawng siam zawh tawh chu resurfacing hna thawh turin March 12, 2018-ah sanction in Tender nghal a nih thu leh Selection Approved hun Ministry in an lak rei avangin Re-Tender leh niin chumi chhunga Tender Document thar EPC Mode-a thlak a nih avangin kumin February 28 khan Tender \hat leh a nih thu an tarlang a. Work Order pe turin sanction nun hun Ministry in a tihnun, Renew nghah mek a ni tih an tarlang a. Sawrkar \hahnemngaihna in sum a theih ang ang a pek a\angin Fur hmaa a khuar chhe zual lai Concrete Pavement a siam niin Patch Repair te pawh thawh a nih thu leh hei hian Fur hma kha chuan a ti ziaawm ve viau tih an tarlang a. Amaherawh chu vanduaithlak takin kumin June leh July thla ah Tuitun leh Huanmawi-ah leimin vanga Road Block awmin kawng enkawltu te chuan Road Block buaipui reng renga hun an hman avangin Road surface repair hna hi a hun takah thawh hman a nih loh thu leh Pothole hmun engemawzat ah alo awm hman thu an tarlang a. Tunah hian Road Block te thenfai a ni tawhin, an ngaihsak hman loh chhunga kawng khuar thuk tak tak te repair hna ngawrh taka thawh \an a ni tih pawh tarlangin, “Heng khuar te hi ngawrh taka hnawh mek a ni a, khua in a zir chuan kar hnih chhung vel chuan a chhe zual pui hi zawh hman beisei a ni,” tiin Khuarel chhiatna kan tawh chu mipui in an hriatthiampui an beiseiin an ngen tih an tarlang bawk.

Hetihlai hian Mizoram Tipper Association (Driver's and Owner's) te chuan Mizoram chak lakna ber National Highway 54, Kawnpui-Buichali inkar chu a chhiat tawh em avangin naktuk Oct. 17, 2019 a\ang hian rit phur lirthei te chu helai kawng zawh lo turin an ngen thung a. Mizoram Tipper Association (Driver's and Owner's) te hian nimin khan Kolasib-a MJA Press Club-ah chanchinbu mite kawmin an harsatna chungchang an hrilh a, Kawnpui-Buichali inkarah hian kawng chhiat vangin lirthei engemawzat a tluk tawh bakah driver hliam tuar an awm nual tawh tih sawiin, hliam zinga pahnih chu Kawnpui PHC-ah enkawl niin tunah chuan an chhuak tawh tih an sawi a. Kawng a chhiat nasat em em laiin a siam\hat lam a chak thei lova, kawng siam tur hian mihring an tlemin hmanrua pawh a beitham hle niin an sawi. Hei vang hian chak zawka helai kawng siam a nih theihnan hian naktuk, October 17, 2019 a\ang chuan rit phur lirthei te chu helai kawng zawh lo tura an ngen bakah Tipper bik te phei chu an ngenna ngai pawimawh zual turin an ngen a ni. MTA hruaitute chuan NH-54, Kawnpui-Buichali inkar chu an dang dawn lo tih sawiin, “Lirthei rit phurin helai kawng kan zawh loh hian chak zawka kawng siamtuten hna an thawh theihnan sawrkar kan hnatlan puiah kan ngai,” an ti.

Helai kawng bakah hian Mizoram mamawh lakna kawngpui pawimawh \hahnem tak a chhia tih pawh sawiin MTA hruaitute chuan, Bairabi-Zamuang inkar kawngchhia leh Lei (bridge) awngrawp tak avangin Mizoram Balu \ha, Langkaih balu phurhchhuah theih a ni lova, Serlui balu \ha pawh Phainuam-Saiphai kawng a \hat loh vangin lakchhuah theih a ni lo niin an sawi a. “Hei vang hian Mizoram balu hi nitin cheng nuai 10 vel a luangral \hin," an ti a, hemi ti bo tura kawng \ha siamsak turin Mizoram sawrkar an ngen tih an sawi a. State pawnlam mi ten Mizo-ram-ah lirthei registration an ti reng chu a pawi an tih thu pawh he hunah hian an sawi bawk.