Kan rama tual\o Rua leh Mau te ngei hman \angkai a pawimawh - Lalduhoma, MLA

Serchhip bialtu MLA, Lalduhoma chuan ramdang Rua lakluh a, a chi supply tu nih duh vanga phili chung lovin, kan rama tual\o Rua leh Mau te ngei hman \angkai a pawimawh thu sawiin, “IAS ten ban phah nan em an hmang lo a nih pawhin, kuttum-a eizawng mi tam takte tan malsawmnna a ni ngei ang,” a ti.

Nimin-a Aizawl Press Club-a thuthar thehdarhtute a kawmna hunah ZPM a\anga Independent MLA-a thlantlin Lalduhoma chuan Mizoram Chief Minister chuan a sawrkar Flagship Programme chu ‘Mau’ ni lovin ‘Rua’ a nih zawk thu a puang \hin tih sawiin, min chintir a tumte chu raw chi 2 – Brandisii leh Latiforus te an nih thu a sawi a. Brandisii hi Manipur-a Jeribam chhehvel bakah Andaman, Myanmar leh Thailand-ah te an tual\o nia sawiin, Coorg District, Karnataka-ah Burma a\anga an lakluhna rei tawhin, ‘Burma Rua’ an tih mai thu a sawi a. “Brandisii hi hung nei a ni a, a lian a, a ngil a, a tuai a ei tlak bawk. Zar a ngah a, hlawi zung zung a ngai a, a rit a, thâ a heh hle. Tual\o a nih lohna hmunah chuan natna a ngah hle a, enkawl ngun ngai tak a ni. Tui a pai tam a, a duap a, a ngêt zung zung a, sawngbawl (treat) a nih loh chuan kum 1 a daih meuh lo. Kum 45-50 danah a tâm ve \hin a. Thlangra, hnang, pal ban, leihlawn leh Agarbati kuangah an hmang ber,” a ti a. Latiforus hi Taiwan, China leh Myanmar-ah an tual\o nia sawiin, “A hung a lian a, raw chi-ah chuan a sang thei ber a, a châng a khat hle bawk. A tuai erawh a eitlak vak loh va, a tâm ve \hin bawk. A duap a, natna a ngah a, a tlo lo hle, sawngbawl loh chuan kum a daih lo. Thil siam nan eng company mahin an la hmang lova, Raw hriat hlawh lo tak a ni,” tiin Central sawrkarin a recognised zingah pawh a tel lo niin a sawi bawk.
Lalduhoma chuan kumin July 15 khan Chief Minister hian Raw chi \ha 3000 vel hardening tura phun a nih tawh thu te, sing khat dang a lo thlen leh tur thu leh maktaduai sawm vel phun tur kan mamawh thute a sawi nia sawiin, Zonet in RTI hmanga zawhna an zawh ah erawh chuan Department lam chuan tu nen mah Agreement siam a la nih loh thu te, Supplier tur pawh thlan a la nih loh thu te, a chinna hmun tur pawh thlan a la nih loh thu te, ruahmanna pawh siam a la nih loh thute leh kuminah eng Raw chi mah lakluh an la neih loh thute an sawi thung nia sawiin, “Flagship Programme meuh si, Official lamin an hriat-pui tlat lo mai hian ngaih a ti \ha lovin, mipui lu a tihai lo thei lo,” a ti.
Mizoram-ah hian Rua leh Mau tual\o chi 25 lai kan nei sa tih pawh sawiin Lalduhoma chuan, ramdang a\anga lakluh hian natna an ngah bik a, Sik leh sa, mihring leh nungchate a nghawng theih dan turte pawh zir chiang lovin MNF sawkar hmasa khan ram dang a\angin chi hrang hrang sawm lai an lo lalut tawh tih a sawi a. Heng te hi hlawhtlinna hmuh tur a awm loh thu sawiin, “Ni 21.6.2019 a Session-a ka zawhna chhanna ah chuan, rua leh mau chinna hmun hi 38601 Ha zeta zau kan lo nei reng mai a lo ni a. Mizoram puma rua leh mau a\anga sawrkarin a hlawkna a tel tawh erawh chu Rs.24,000/- chauh zu nia,” tiin hei hi Sakawrhmuituai Plantation a\anga Mau pum 800 an hralhna man a nih thu a sawi bawk.
Lalduhoma chuan Khuanu min pek mahni ta hmusit a, ram dang thil ngaihsan inzirtir chu sual a tling tih sawiin, “Kan rama tual\o Mautak (Melocanna Baccifera) te, Raw\hing (Bambusa Tulda) te, Rawnâl (D. Longispathus) te hi an \ha em em vek a. Heng hmang hian Mutha Industry, Tripura chuan Bamboowood etc. te a siam a, Airport hrang hrangah chhuat leh banga hman tur an supply reng a, tunah hian kum 3 daih supply order an nei mek a ni,” tiin “Heng kan ram Rua leh Mau te hmang hian Processing Unit tê deuh a\anga Chipping Plant leh Pulp and Paper Industry thlengin din kan tum tur a ni zawk dawn lawm ni?” tiin chu chuan eizawnna tak tak min pek tur thu a sawi bawk.

Comments

Chhiar Hlawhte