Mizoram Larsap thar tur ruat a ni ta

India President chuan Mizoram Governor atan PS. Sreedharan Pillai a ruat a, Mizoram Governor hna chelh mektu, Jagdish Mukhi chu a thlak ang.
Zirtawpni khan Rashtrapati Bhawan chuan thuchhuah siamin India ram State \henkhat a Governor tur hi a ruat thar a, Mizoram in hun engemaw chen Governor nghet a neih tawhloh hnuah PS. Sreedharan Pillai hi Mizo-ram Governor atan hian ruat a ni. Mizoram Governor thar tur, PS. Sreedharan Pillai hi Kerala-a Venmony-a piang niin kum 65-a upa a ni a. NSS College, Pandalam a\angin Arts Subject-ah a graduate a. Kum 1978 khan Govt. Law College, Calicut a\angin Law Degree a zir zo leh bawk.
Kum 2003 a\anga 2006 chhung khan Kerala State BJP President a ni a. Kum 2018 khan khatihlaia Kerala State BJP President, Kummanam Rajasekharan chu thlakin Kerala BJP State President a ni leh a, he hna a chelh mek laiin Mizoram Governor atan ruat a ni a, Central BJP-ah National Executive Council Member a ni bawk.
Mizoram Larsap thar tur hian karleh Thawh\anni, Nov. 4 khian Aizawl a rawn thlen beisei a ni a, a tuk Thawhlehni-ah Mizoram Larsap thar atan hian lakluh rin a ni bawk.
Mizoram hi kum 1972 a\angin Lieutenant Governors hran neiin a awm a, kum 1987-a State dinhmun a luah hma zawngin Lieutenant Governors 6 a nei hman a. Kum 1987-a Mizoram in State dinhmun a luah hnuah P.S. Sreedharan Pillai hi Governor nghet 15-na tur niin hemi karah hian Mizoram Governor hna chelh lailawktu mi 5 an awm tawh bawk a ni.
MZP President, L. Ramdinliana Renthlei chuan Mizoram in ama puala Larsap a nei chu lawmawm a tih thu a sawi a, chutih laiin sawrkar laipuiin kum 2014 a\anga tun thlengin Larsap 9 lai a rawn dah a, an hun hmang zo pakhatmah an awm lo chu Hnam anga inngaih pawimawh lohna-ah an ngaih thu a sawi.
Hetihlai hian MPCC thupuangtu, Lallianchhunga chuan Mizoram Larsap thar hi Kerala BJP President a nih avang leh a hma a Larsap pawh Kerala BJP President tho a nih avangin Kerala BJP hruaitu, inthlanpui a tling theilo te rawn dah bona atan Mizoram hi an hmang ni a a ngaih thu a sawi a. BJP hi Mizoram-ah an luh thuk theih loh avangin BJP hruaitute Larsap a rawn dah hi an hmanraw pakhat a nih a rin theih thu a sawi bawk.

Comments

Chhiar Hlawhte