Advertisement chhuah lovin School Education hnuaia thawk tur mi 91 lak an ni tawh - MPCC

Mizoram Pradesh Congress Committee (MPCC) Media Department chuan MNF sawrkar-ah Advertisement chhuah lovin School Education hnuaia thawk tur mi 91 lak an ni tawh tih an sawi a. Advertisement chhuah loha hnathawktu lak zinga tam zawk hi Education Minister in a mi duhsak zawngte a thun niin an sawi bawk.

MPCC Media Department chuan Inrinni khan an Chairman, Lallianchhunga hovin Aizawl Congress Bhavan-ah chanchinbumite kawmin kum 2018 December thla a MNF-in sawrkarna an chan a\anga thla 10 chhung, December 2018 a\anga September 2019-ah School Education hnuaiah Advertisement chhuah lo a hnathawktu lak 91 a awm tawh tih an sawi a. Heng zinga 36 chu SSA Mission hnuaia lak niin, 55 chu RMSA Mission hnuaia lak an ni thung tih sawiin, heng Advertisement chhuah lo a hnathawktu lak zinga tam zawk hi School Education Minister, Lalchhandama Ralte-in a mi duhsak zawngte a thun an nih thu an sawi bawk.
MPCC Media Department huan SSA leh RMSA khaikhawmtu Samagra Shiksha, Mizoram-a SPIO-in RTI zawhna a chhan danin December 2018-September 2019 (thla 10) chhungin SSA Mission bikah hnathawktu 36 lak an ni tawh thu leh heng te hi Advertisement chhuah lo a duhsak zawng lak vek an ni tih sawiin, Advertisement chhuaha hnathawktu lak an awmloh thu an sawi a, heng mi 36 lak zinga 16-te chu an permanent post a awm lova hmun danga attach nghal an ni tih pawh sawiin, Advertisement chhuah loa hnathawktu lak te hi Health & Physical Instructor atan mi 8, Art Education Instructor mi 4, Resource Person mi 7 leh UPS/PS Teacher mi 17 lak an nih thu leh heng mite hlawh atan hian kum khat ah Rs. 10,080,000/- zet a kalral dawn tih an sawi a. SSA Mission hnuaiah hian MNF sawrkar atangin mi 49 transfer an ni tawh tih an sawi bawk.
Hei bakah hian MNF sawrkar hnu thla 10 chhungin RMSA hnuaia hnathawktu mi 87 lak tawh tih sawiin, heng zinga mi 32 chu Advertisement tihchhuaha lak an nih laiin a bak 55 erawh chu Advertisement chhuah lo a lak an ni thung tih an sawi a, heng te hi IV Grade-ah mi 1, RMSA Secondary School Zirtirtu-ah 45, Higher Secondary School Zirtirtu-ah mi 8 leh Special Educator-ah mi 1 niin RMSA hnuaia Advertisemernt chhuah lo a hnathawktu lakte hlawhah hian kum khatah Rs. 17,892,000/- zet a kalral dawn tih an sawi a. SSA hnuaia lakte nen phei chuan kum khatah Rs. 27,972,000/- zet a tlin thu an sawi bawk.
Hei bakah hian MPCC Media Department hotute chuan RMSA zirtirtu 32 lakna tur advertisement tihchhuah a ni tho laia Recruitment Rules (RR) awm lo chhuanlam a Advertisement pawh chhuah lo a zirtirtu leh hnathawktu dang, a mi duhsak zawng 91 zet mipui nawlpui hriat loha lak a ni leh si chu mak an tih thu an sawi a. “Advertisement chhuah theih reng a nih lai a, hetiang mai mai a hnathawktu la duhtu Education Minister hian dikna a duh tak tak lo tih a chiangin, MNF party hotute leh an party mipui ten Education Minister an ring zo lo hi a lo awm hle a ni tih hi MPCC ngaihdan a ni,” an ti bawk.
Tunhnaiah MNF sawrkar in MR-a thawk tur Primary School leh Middle School zirtirtu 881 zet a la thar tih sawiin, School Education Minister-in dik taka lak niin sawi mah se, anmahni party hruaitute leh party mipuite ngeiin Minister hi an rin zawh loh avangin Hnam Run a\angin zirtirtu lakna chu ennawn tir lehin tun thlengin siamrem hna an la thawk zel tih an sawi a. Heng Zirtirtu lak thar 881 te hi MR Skilled-II ah dah niin, ni khatah Rs. 520/-hlawhin thla khatah Rs. 15,600/- an hlawh dawn a. An ni aia hlawh tam zawk tur, Rs. 30,000/- thleng hlawh turte advertisement chhuah lo a duhsak zawng lak an ni chu Mizoram mipuite leh \halai lehkhathiam zawkte zahlohna dik takah an ngai ti an sawi bawk.

Comments

Chhiar Hlawhte