Serchhip-a Leisekawt Mual laihzauh hna chu Sports Minister hovin thawh \an a ni

Serchhip P&E Veng-a Leisekawt Mual chu laihzauh a ni dawn ta a, nimin khan he Mual laihzauh bul \anna hun hi hmangin Sports Minister, Robert Romawia Royte chuan Bawngtuthlawh hmanga laiin bul a \an a ni.
Leisekawt Mual laihzauh bul \anna puala inkhawm tawi ah hian Sports Minister, Robert Romawia Royte chuan he Mual laihzauh a nih theih nana hmalakna ah hian mi fakawm tak tak an awm thu sawiin, Serchhip khawtlang in Leisekawt Mual laihzauh a nih theihna tur leh chumi denchhena RD Department in Quarters thar an neih theihna tur rawtna siam a ni chu lawmawm a tih thu leh Pathian tan pawh malsawm tlak a nih thu a sawi a, hemi atana khawtlang mipui te ngaihtuahna senna ah Mizoram sawrkar leh Sports & Youth Services Department aiawhin lawmthu a sawi a. Mizoram-ah Field tam tak an lai tawh chungin tun thlengin Field indaihlohna chu ala nasa hle tih sawiin, hetianga Field zau \ha a awm theihna tura RD Department ram laih a nih theih nana hma latu Rural Development Minister, Lalruatkima chungah pawh lawmthu a sawi bawk a. He Mual laihzauh hna hi a hun taka zawh hman a beisei thu a sawi bawk.
MNF East Block Serchhip President, T. Zadingliana kaihhruai he hunah hian Adviser to Chief Minister, C. Lalramzauva pawhin he Mual laihzauhna tura sum hman tur hi khawi Department sum hman turah mah a lan loh thu leh sawrkar Budget-ah pawh a lan loh thu sawiin, mipui leh ram mamawhna avang leh Serchhip in K|P General Conference a thlen tura Organising Committee te ngenna Chief Minister in a ngaihtuahna senga a duhsakna avanga laih theih chauh a nih thu a sawi a. He Mual laihzauhna tura CM duhsakna ah kan lawm \heuh a beisei thu a sawi bawk. He hun hmanpuitu H. Biakzauva MLA pawhin MNF kaihhruai Mizoram sawrkar chuan kum khat pawh ala tlin hmain hna tam tak a thawk tawh nia a lan thu sawiin, Serchhip bial chu Eptu MLA Bial ni mah se Adviser to Chief Minister zarah thil tam tak ti-a hmalak a nih thu a sawi bawk.
Nimin zing a Leisekawt Mual laihzauh bul \anna hunah hian K|P General Conference Organising Committee Chairman, Upa Vanlalchhunga chuan report pein he Mual laihzauh a nih theihna tur hian June 22, 2018 khan rel a ni a, hemi hnu hian chak taka hmalak zui niin kumin Sept. 16 khan Chief Minister hova sawrkar mi pawimawh te \hukhawm chuan a laihzauh hna chu Sports & Youth Services Department thawh tur leh RD Department ram-a building awmte sawnchhuaka a sak \hat hna chu RD Department thawh turin an rel fel a. A laihna atan hian cheng nuai 195 vel ruahman niin RD Department-a Quarters 5 chu \hiatin DRDA Office bula Quarters pathum chu \hiat bawkin hetah hian Quarters thar sak a ni anga, heng chhungkaw 8 luahlai Quarters tihchhiat leh sak \hat nan hian cheng nuai 372 vel sen tura ruahman a ni bawk.

Comments

Chhiar Hlawhte