Serchhip-a Paragliding World Cup atan Organising Committee an \hukhawm

Nakum February ni 10 a\anga Serchhip khuaa Paragliding Accuracy World Cup 2020 and Grand Festival neih tura Organising Committee chu nimin khan a vawikhatna atan an Chairman Sports Minister, Robert Romawia Royte hovin a Pisa-ah an \hukhawm.
Paragliding Accuracy World Cup 2020 and Grand Festival Organising Committee \hutkhawm ah hian Sports Minister, Robert Romawia Royte chuan he World Cup kan thlen tur hi a phurawm takzet tih sawiin, Mizoram in infiamna lamah nasa taka hma a lak mek laiin khawvel pum huap inelna World Cup meuh thlen theihna tur remchang kan hmuh hmasak ber chu Paragliding a nih thu leh hneh taka kan thlen theih nan theihtawpa \an la turin he huna kalkhawmte chu a sawm a. Mizoram tan mel lung pawimawh tak kan phunna tur, khawvel huapa Mizoram kan phochhuah theihna hun remchang a nih thu a sawi bawk.
Paragliding Accuracy World Cup 2020-ah hian khawvel ram hrang hrang a\angin paragliders 130 leh Official 20 vel tel thei tura ngaih a ni a. Mizoram a\angin tel thei tur license buaipui mek mi pathum an awm bawk. World Cup hi hneh taka thlen a nih theih nan nimin-a Organising Committee \hukhawm chuan Sub-Committee peng hrang hrang pali (4) a din nghal a. Chungte chu - Logistics Committee, Programme Committee, Promotional Committee leh Infrastructure Committee te an ni. Heng Committee peng hrang hrangte kaihruaitu tur Chairman leh Secretary ruat nghal an ni a. Ruahmanna an siamfel hnuah Organising Committee-ah an thurelte an thlen leh dawn a ni.
Mizoram in Paragliding a hmelhriat \anna chu kum 2008 niin Japan, Switzerland leh Korea a\angin Paragliders ten Lunglei leh Aizawl-ah Test Flight an nei a. Paragliding lama tui miten pawl siamin Mizoram Aero Sports Association (MASA) din a nih hnuah an member engemawzat in Paragliding an train chhuak tawh a. Nakum-a Paragliding World Cup nghahna tur hi Serchhip khawchhung a\anga KM 7 vela hla, Kei\um leh Serchhip inkar tlang chhip-ah a awm a. He hmun hi Aerosports leh Paragliding lam mi thiam, ramdang a\anga lo kal ten vawi engemawzat endik tawhin a hmunhma hi Paragliding neih nan Asia khawmualpui-ah a \ha ber pawl ni a ngaih a ni a. Nikum khan helai hmunah hian Pre World Cup neih a lo ni tawh a ni.
Paragliding Accuracy World Cup 2020 and Grand Festival Committee-ah hian Chief Minister, Zoramthanga chu Chief Patron niin Patron-ah Adviser to Chief Minister C. Lalramzauva leh Planning Secretary Dr.C.Vanlalramsanga te an awm a. Wg. Cdr. J. Lalhmingliana, Principal Consultant, Aviation Wing, GAD chu Working Chairman niin Vice Chairman-ah Tourism Secretary, Esther Lalruatkimi leh Organising Secretary-ah MASA President, J.Vanlalliana te an ni.

Comments

Chhiar Hlawhte