Bru chhungkaw 190 te rawn kir tawh

Tun thla ni 3 a\anga Tripura Relief Camp-a awm Bru hruaikir hna thawh mekah Inrinni thleng khan chhungkaw 190 hruaikir an ni tawh a, Inrinni khan Kaskau Relief Camp a\angin Bru chhungkaw pakhat mi 5 chu anmahni duhthu in an rawn kir leh bawk.
Tripura Relief Camp a\anga Bru hruaikir hna thawh mekah hian Ningani khan Hazacherra Relief Camp a\angin Bru chhungkaw 20-a mi 81 te chu Lunglei District-a awm tura hruaikir niin heng mite hi Lunglei thlenpui an ni tawh a. Lunglei District-ah hian Bru chhungkaw 364-a mi 2,051 hruaikir tur a nih laiin Inrinni thleng khan Bru chhungkaw 68-a mi 262 hruai kir tawh an ni.
Mamit District-a awm tur Bru chhungkaw 11-a mi 48 te chu Zirtawpni khan anmahni duh thu-a Mizoram-a rawn kirin Inrinni khan chhungkaw pakhat-a mi 5 chu anmahni thu in an rawn kir leh bawk a. Mizoram Home Department hotute'n an sawi dan chuan hetianga mahni thiam ang anga lokir an tamna chhan hi Relief Camp paruk-a an hruaitute'n kir lo tura an tih vang niin Mizoram sawrkar Official ngeite pawh Tripura Relief Camp-a Bru chhungkuate hruaikir tura an kalkawngah ni hnih chu Bru mipui pungkhawmin an lo dang tawh a. Mizorama hruaikir an duhlohzia lantirna'n kawngte zawhin sawrkarah lehkha tam tak an thehlut tawh bawk. Home Department hotute chuan Bru chhungkaw tam takin Mizorama lokir an duh a, nikum July ni 3-a Delhi a inremna an siam anga an dawn turah pawh an lungawi tawk hle a, mahse, hlauh an neih avangin langsar takin an lokir ngam lo a ni.
Hetihlai hian Mizoram Bru Displaced People's Forum (MBDPF) President A. Sawibunga, Bru Tribal Development Society (BTDS) President, Vipin Kumar Msha leh Mizoram Bru Indigenous Democratic Movement (MBIDM) General Secretary, Philip Apeto-te chuan Zirtawpni khan North Tripura Bawrhsap hnenah lehkha thehlut lehin October thla bul a\anga pawisa leh eitur an dawn tihtawp a nih avangin ril\ama thih an hmabak niin an sawi a. Swrkar laipui hnena an dinhmun hriattir a eitur leh pawisa pek chhunzawm leh thuai turin an ngen a. Hetianga eitur nei lova an awm reng chuan buaina a chhuah a sawrkar buhfai dahkhawlna kudam-te rawk a nih mai an hlauhthawn thu an tarlang a. October ni 3 leh November ni 30 inkara hruaikir hna thawh tura tih a nih lai a eitur leh pawisa dawn tihtawp a ni chu kawruak chunga haw tura tih an nih avangin mihring chanvo palzutna a ni an ti bawk. Hei bakah hian MBDPF, MBIDM, BTDS leh Bru Displaced Women Welfare Organisation (BDWWO) te chuan sawrkar laipui-ah lehkha thehlutin tunhma a an la ngiat ngai loh Dampa Tiger Reserve \hiat a a chhunga inbenbel an phutna an thlen a. He ramngaw humhalh hi tunhma a an lo chen tawh \hinna niin an sawi bawk.

Comments

Chhiar Hlawhte