Health Minister in Thingsai PHC a hawng

Health & Family Welfare Minister, Dr. R. Lalthangliana chuan Inrinni khan cheng nuai 108.97 senga sak Thingsai-a Primary Health Centre (PHC) chu a hawng.
Thingsai PHC hawnna ah hian bialtu MLA ni bawk Dr. R. Lalthangliana chuan Thingsai PHC chu Hnahthial District thar in a ken tel hmasawnna ruhrel pawimawh tak pakhat a ni tih sawiin, Thingsai leh a chhehvel khua mipuiten \angkai taka an hman theih turin duhsakna a hlan a. Tunah chuan bul an \an tawhin a tawp a thleng tur a ni tih sawiin, Hnahthial District ti hmasawn zel tura pawimawh hrang hrang - inkalpawhna kawng siam \hat, zirna In thuam \hat leh Higher Secondary School te sawrkar School-a hlan kai, PHC leh Sub Centre-te mamawh hmanrua leh Staff dah, sawrkar pisa leh Quarters-te, mipui mamawh em em Bank Branch hawn kawngah te hmalak mek zel anih thu kalkhawmte a hrilh a. Health and Family Welfare Department hnuaia Hospital, PHC leh Sub Centre te ti changtlung zel tura World Bank hotute vawi hnih lai a dawr thu leh heng PHC leh Sub Centre te mipuite tana \angkai zawk turin Health and Wellness Center ah hlan kai zel an ni dawn tih a sawi bawk.
Thingsai chu Myanmar border maia awm anih avangin Border Trade-ah ala pawimawh chho zel dawn tih sawiin Commerce and Industries Department changtu Minister ni bawk, Dr. R. Lalthangliana chuan sawiin, Border Trade hmalakna chungchang ah sawrkar laipui Official-te nen indawrin heng Official-te hian a hmun ngeia Mizoram Border Trade hmalakna rawn hmu tur leh hmachhawp thlirho turin Mizoram rawn tlawh thuai an tum thu a sawi bawk.
Thingsai Primary Health Centre hi cheng nuai 108.97 senga sak niin RCC Building a ni a, a zau zawng Plinth Area 469.53 Square Metre a ni a. He PHC hi changtlung taka ruahman niin khum pathum (3) ve ve awmna Mipa leh Hmeichhe Ward bakah X-Ray Room, Dark Room, Laboratory Room, Dispensary, Consultation Room, Wwaiting Area, Office, Delivery Room, Sterile Room, Kitchen, Nurse Station, Minor OT, Dry Zone leh inthiarna Toilet panga(5) leh Bathroom pahnih (2) a awm a ni.
Thingsai PHC enkawl tur hian Medical Officer dah ngheh nghal niin July 2019 a\ang khan Dr. Betty Laldintluangi chu dah a ni a. Tun dinhmunah Nurse pathum (3) leh IV-Grade pahnih (2) an thawk mek a. Thingsai khua leh a chhehvel mipuiten he PHC hi an hlut hle a, pawl hrang hrang leh mimal ten thilpek chi hrang hrang an lo pe tawh a ni. He Building thar hawnna hun hi Dr. ZR. Thiamsanga, MLA, Vice Chairman Health & Family Welfare Boardm pawhin a hmanpui a ni.

Comments

Chhiar Hlawhte