Adviser to Chief Minister in Serchhip bial-a hmalakna hrang hrang tlawh chhunzawm

Thenzawl khaw chawmtu tur tuilakna tura PHE Department ten Vanva lui an khuah tur chu Inrinni khan Adivser to Chief Minister, C. Lalramzauva’n a tlawh.

PHE Department hian Thenzawl khaw mipuite chawmna atan hian Thenzawl Vengthar-ah Vanva lui chu khuap turin hma an la a, he tuikhuahna atan hian cheng nuai 445 ruahman niin helai hmun tlawhtu Adviser to Chief Minister hi PHE Serchhip WATSAN Division-a Sr. EE, Er. F. Lalsanglura leh SDO, Er. Samuel L. Ralte ten an lo dawngsawng a, PHE Department hotute chuan he tuikhuah atana inbuatsaihna leh ruahmanna hi an peihfel tawh thu leh pawisa a awm ve leh hna \an nghal theih anih thu a sawi a. He tuikhuahna tura sum mamawh tur hi Adviser to Chief Minister, C. Lalramzauva chuan PHED Minister, Deputy Chief Minister ni bawk, Tawnluia leh Chief Minister, Zoramthanga pawh a sawipui tawh thu sawiin, beiseina sang tak a neih thu a sawi a, Vanva tuikhuah chu tuilakna mai bakah, zangkai zawka Sangha khawina leh mipui intihhlimna Lawngleng dah theih te pawh a \hat a rin thu a sawi.

PHE Department hotute chuan, he tuikhuah hi Thenzawl mipui tana tuilakna lian ber tur Mat project an thawh hmaa Thenzawl mipui chawm thei tura an ngaih thu leh, tuna Thenzawl tana Sailam rama mi tui an lak mek chu nikhatah mipakhat tan litre 35 a pek theih a ni a, Vanva tuikhuah zawh anih hunah chuan nikhatah mipakhat tan tui hi litre 55 a pek theih anih tur thu an sawi.

Hemi hnu hian Adviser to Chief Minister hian Thenzawl-a Horticulture College sak mek chu tlawhin a dinhmun leh hmasawnna turte a en nghal a, zirtirtu leh thawktuten an lo dawngsawng a, an mamawh leh hmalak ngaihna thil \ul an lo thlente chu Adviser to Chief Minister hian a ngaihthlak sak a, building hrang hrang, Hostel Building-te leh Room hrang hrangte mamawh leh thil \ul dangte a en kual nghal a ni. Horticulture College Building hrang hrang sak mekte hi March ni 31, 2020-a zawh hman tura tih niin NPCC ten a sak hna hi an thawk a ni.

Hemi hma Zirtawpni tlai khan Adviser to Chief Minister hian Serchhip Sailiamkawn-a Mizofed ram chu a tlawh a. Mizofed hian Sailiamkawn-a an ram-ah hian mipui harsatna sutkian nan Petrol Pump siam tumin hma an lo la tawh \hin a, helai hmun hi Petrol Pump atan duhthusam ni mah se a chhak-ah hian Mizoram chhimlam Eng pekna line pui Tower a ding a, hei vang hian hma pawh lak zui hleihtheih a ni lo a. Hemi chungchang hi khawtlang hruaitute chuan Adviser to Chief Minister hnenah hian thlenin C. Lalramzauva chuan Serchhip khawtlang in Petrol Pump a neih belh theihna tur a nih chuan a chhak-a a ram-ah he Tower hi sawn mai a remtih thu a sawi nghal bawk a ni.