Mizoram H&TE Minister in Guwahati-a zirna In sang-a hotute a kawm

Higher & Technical Education Minister, Dr. R. Lalthangliana chuan nimin leh niminpiah khan Guwahati-a hmun leh zirna In pawimawh te tlawhin Assam Finance leh Health & Family Welfare Minister ni bawk, Dr. Himanta Biswas pawh hmuin Mizoram sawrkar nena thawhho theihna kawng hrang hrang an sawidun.

Dr. R. Lalthangliana hi ‘Indo-Bangladesh Stakeholders Meet’ a a tel zawh hnuah Indian Institute of Technology (IIT) Guwahati, Assam Vety. Science College leh Guwahati Medical College te tlawhin Institute of Technology (IIT), Guwahati hotute nen an inkawmna ah Mizoram-ah IIT a awm ve loh avangin IIT Guwahati te nena thawhho a duh thu a sawi a; IIT hotute chuan Mizoram-ah IIT Extension din theih dan tur kawng lo hrilhin, Dr. R. Lalthangliana’n a sawmna angin IIT Guwahati chuan Mizoram-ah an mithiamte rawn tirin training course hrang hrang rawn tihpui an hreh loh thu an lo hrilh bawk a. A bik takin entrepreneurship lamah training pe thei tur mithiam tak tak an neih thu an hrilh chu Minister-in sawrkar Programme pawimawh tak SEDP hnuaia hmalakna atan Entrepreneurship Training pawh a \angkai hle dawn tih sawiin, Mizoram rawn tlawh thuai turin a sawm nghal bawk.

H&TE Minister-in Assam Vety Science College a tlawhna ah hian Principal, Dean leh hotu dangte nen inkawmna neiin Mizoram Vety te nena thawhhona \ha nei chho zel dan turte sawiin, Selesih-a Vety College te nena Student Exchange Programme neih theih nan hmalak nise an ti a. Nimin chawhnu khan Guwahati Medical College tlawh lehin Pro. Vice Chancellor, Dr. Dipika Deka leh an hotu dangte nen an inkawm a. India hmarchhakah Medical College hlun leh changtlung ber an nih angin Mizoram-ah Medical College din thar hmasawn zelna turah pawh anni nena thawhho a pawimawh hle dawn tih a hrilh a. GMC Pro. Vice Chancellor chuan Zoram Medical College-a Junior Doctor-te chu Oncology (cancer), Cardiology leh Neurology lamah training pek a remtih thu Minister a hrilh nghal a ni.

Dr. R. Lalthangliana hian nimin chawhma khan Assam Finance leh H&FW Minister ni bawk, Dr. Himanta Biswas chu a pisa-ah tlawhin hmarchhak State 8-ah hriselna lam inenkawlna tur Hospital, CHC, PHC te chu duhthu ala sam lo hle a, helamah hian \anlak ho a pawimawh a tih thu a sawipui a. Dr. R. Lalthangliana chuan Union Health Minister, Dr. Harsh Vardhan leh Assam Chief Minister, Sarbananda Sonowal pawh a lo sawipui tawh angin November ni 13-16, 2019 inkarah Guwahati-ah North East State 8-a Health Ministers Meeting koh a rawt chu Assam Health Minister chuan a lo pawmpui a. He meeting-ah hian hmarchhak bial-ah Medical Infrastructure tihchangtlun te, Medical Doctor leh Staff indaihlohna phuhruk dan tur te, Hospital facilities tih\hat leh thil pawimawh dangte sawiho an rawt a ni.