Chief Minister in Aizawl leh Guwahti inkara thlawhna service thar GoAir a vailiam

Lengpui Airport a\anga Aizawl leh Guwahati inkar thlawhna service thar, GoAir chu nimin zing khan Chief Minister, Zoramthanga chuan Lengpui Airport a\angin a vailiam a. Kumin February ni 10-a Jet Airways in Mizoram leh India hmarchhak state danga service a tihtawp hnu a Mizoram leh Assam inkara thlawhna service neih leh hmasak ber a ni.

GoAir Flight service lawmna inkhawmah Chief Minister chuan hun rei tak Mizoram mipuiten an lo nghah hnua Aizawl leh Guwahati inkar Thlawhna service a awm leh ta chu lawmawm a tih thu a sawi a. Damlo inenkawl tum te leh zirna leh hna thil avanga zinchhuah ngaite bakah Mizorama rawn zin turte tan he thlawhna service hi a pawimawh thu te, Service a awmloh hun chhunga mi tam takin harsatna an lo tawh phah thu a sawi a. GoAir bakah Flight Service dangte a awm belh zel a beisei thu leh chumi atan chuan Lengpui Airport pawh kawng hrang hranga thuam\hat hna thawh a, hmalakna thar siam belh mek zel a nih thu Chief Minister chuan a sawi bawk.

Airport Authority of India (AAI) Regional Executive Director, Sanjeev Jindal pawhin Mizoram Chief Minister \hahnemngaihna leh hmalakna avanga Guwahati leh Aizawl inkar Thlawhna service a awm leh ta chu lawmawm a tih thu a sawi a. Heng khawpui pahnih inkara Flight Service siam hi sum siamna lam aiin mipui mamawh phuhruk tumna a nih zawk thu a sawi a. GoAir Vice President Harjinder Singh Bhasin chuan Mizoram sawrkar hmalakna chungah lawmthu sawiin, he Thlawhna service thar hian Tourism hmasawnna kawngah pawh rah \ha a chhuah a beisei thu a sawi bawk.

GoAir hi Airline man tlawm, sumdawng company lian Wadia Group ta a ni a. November 2005 khan Airline Operation hi kalpui \an in, nitin Flight 325 a nei \hin a. Aizawl hi ramchhunga service a neihna khawpui, domestic destination 25-na a ni. GoAir Thlawhna hi Airbus320 niin nimin a\anga October ni 26 thleng hian Guwahati leh Aizawl inkar service bakah October ni 27 a\angin Kolkata service a awm tel dawn bawk a ni. Ruahman lawk ang chuan nimin a\anga tun thla ni 26 thleng Guwahati to Aizawl pan tur hi zing dar 6:50-ah chhuakin, Aizawl a\anga Guwahati hi zing dar 8:40-ah Lengpui a\angin a chhuak anga, dar 9:50-ah a thleng ang. Oct. 27, 2019 a\angin Kolkata to Aizawl thlawk hi zing dar 10:00-ah lo chhuakin dar 10:55-ah a lo thleng anga. Aizawl a\anga Guwahati panin dar 11:25-ah a chhhuak ang a. Guwahati a\anga Aizawl panin chawhnu dar 1:15 ah thlawk chhuak lehin, Aizawl a\anga Kolkata pan in chawhnu dar 3:05-ah Lengpui a\angin a chhuak dawn a ni.