Sports Minister hova bul \an a nih hnuah Leisekawt Mual laih chhunzawm ala ni lo

Serchhip P&E Veng-a Leisekawt Mual laihzauh tur chu Sports Minister hovin bul \an ni tawh mah se nimin thlengin hnathawh dang hmuh tur ala awm lova. Nimin khan Adviser to Chief Minister, C. Lalramzauva chuan he Mual laihzauhna tura \ul te a enfiah.

Nimin a Serchhip-a rawn kal Adviser to Chief Minister, C. Lalramzauva hian Serchhip P&E Veng-a Leisekawt Mual hi tlawhin Rural Development Department lam hotute leh mithiam te nen Leisekawt Mual laihzauh dan tur hi an thlir a, tuna he Mual laihzauh turah hian a bul \anna ah chuan BDO Quarters leh Staff Quarters zawng zawng lai nghal lovin helai rama a chuan hnuai, Quaters 5 awmna hmun chu laih hmasak tura ruahman a ni a, a \ul dan anga BDO Quarters awmna lai laihhniam dan turte pawh he hunah hian sawiho niin leimin hlauhawm loh tura laih dan turte pawh he hunah hian sawiho a ni bawk.

Leisekawt Mual laihzauh a nih dawn avanga helai hmuna BDO Staff Quarters awm mek 5 luahtute sawnchhuah dan tur pawh he hunah hian sawiho niin heng mite tan hian RD Department in DRDA Office bula Staff Quarters an neih mek hnuai chu chei\hat tura ruahman a ni a, amaherawh chu heng building te hi a \hat tawkloh avang leh awlsam taka siam\hat zung zung a nih theih loh dan leh a siamna tura hmanraw mamawh te neih theih dan tur pawh sawiho niin, heng Staff Quarters chei \hat dan tur pawh hi a hmunah enfiah nghal a ni bawk.

Hemi hmalam hian Adviser to Chief Minister hian helai Mual laihzauh tura leivung paihna tura ruahmanna awm mek te pawh tlawhin a enfiah a, leivung te hi Leisekawt Mual bul kawr-a paih tura ruahman a nih bakah P&E Veng huamchhung Vety Tuikhur awmna \hin dawlzawlna atan leh Govt. Serchhip College-a zawl siamna atana hman tura ruahman a ni a. Amaherawh chu leivung paihna atan hian sum sen a tlem zawk theihna turin Leisekawt Mual sir-a leivung paihna turah hian a theih ang ang paih hmasak nise, a thlang zel, Leisangkawi-a chhuak kawr-ah a remchan dan angin a dawlna pawh siam nise an ti a. Helai hmun bak hmundang ah te pawh hian a remchan dan anga leivung hi paih tho tura ruahman a ni bawk. Thudawn danin Leisekawt Mual laihzauh hna hi Sports Department hnuaiah thawh a ni dawn a, amaherawh chu tun thlengin lei lai tur hian Contractor thlan emaw an la awmlo thung a, helai hmuna Quarters luah mektute pawh an awmna hmun hi chhuahsan turin emaw tih an la ni chuanglo a, hei vang hian Mual laihzauh hna thawh tak tak hun tur hi sawi theih ala ni lo a ni.