Ramchhung hmundangte rualin Serchhip-ah 'Police Commemoration Day' hman a ni

Nimin khan India rampum ah Police an duty laia nunna chan te hriatrengna leh zahna hlanna Ni, 'Police Commemoration Day' hman a ni a, Serchhip-ah pawh he Ni hi urhsun taka hmangin an duty laia nunna chan Police te sunna hun hmangin Martar chhungte tlawhchhuah a ni bawk.

Kum 1960 a\anga India rampuma hman \hin 'Police Commemoration Day' puala inkhawm hi Serchhip-ah chuan nimin zing dar 7:00 khan Serchhip SP Office Tual-ah neih niin he hunah hian Serchhip SP, R. Sathiyasundaram IPS chuan October ni 21 chu India rampumah Police duty laia nunna chan te, an duty an hlenchhuah avanga mi sual kut tuara thite sunna leh anmahni hriatrengna Ni atana hman \hin a nih thu sawiin, tun \umah pawh hian September ni 1, 2018 a\anga August ni 31, 2019 chhunga ram tana nun hlan Police mi 292 te tan Police Commemoration Day hi hman a nih thu sawiin, ram tana an nun hlantute chu an zahin an chhuang takzet tih a sawi a. Hemi hnu hian India ram State hrang hranga kum kalta chhunga duty laia nunna chan Police awm zat chhiarchhuakin anmahni sunna atan 3rd Bn. MAP te chuan Absush/Shok Parade an nei zui bawk a. He hunah hian Serchhip SP bakah hian Addl. SP, PC. Lal\anpuia te, SDPO Victor Zothansanga leh Serchhip-a Police awm te an tel bakah Marian High School, Serchhip-a Students Police Cadet te pawhin he hun hi an hmanpui bawk a ni.
Police Commemoration Day puala Ser-chhip SP Office tual-a hun hman zawh anih hnu hian Serchhip SP, R. Sathiyasundaram IPS leh a thawhpui te hian Nov. 29, 2007-a Chhattisgarh State Dantewada District-a Konta bula Naxal hel pawl ten Bomb an tihpuah avanga 2nd Mizoram IR Bn. a mi 10 in nunna an chan \uma tel leh ram tana nunna hlantu, Biakrotluanga (L) chenna In, Serchhip Venglai ami chu tlawhin an tawrhpuina lantirna atan Pangpar leh thilpek an hlan a. He hunah hian Biakrotluanga chhungte chuan harsatna an tawh te lo hrilhin, Biakrotluanga boral hnuah Pension an lak theihloh thu leh hei vang hian harsatna tam tak an tawh phah thu te lo thlenin, Serchhip SP chuan heng an harsatna te hi ziaka an hnena thlen tur leh a theih anga an lo bawhzui sak tur thu a hrilh bawk a ni.
British hunlai a\ang tawhin India Police te hian Tibet leh India inrinna lai bawr mel 2500 zet an veng \hin a, October ni 21, 1959 khan Karam Singh, DCIO leh a hote Police mi 20 rual chu ramri bulah China sipai ten lo lambun in Automatic Rifle leh Grenade hmangin an lo bei a. A hmunah mi 10 thiin mi 7 chu hliam na tak tuarin China sipaite chuan an man a. Heng ram tana nunna chante ruang hi China sipai chuan 13th Nov. 1959-ah India kutah hlanin Martarte ruang chu Ladakh hmun a Hot springs-ah chawi-mawina famkim nen halral an ni ta a. Kum 1960 a\ang chuan 21st October chu 'Police Commemoration Day' atana ruat niin kumtin Police ram tana nunna hlante hriatrengna, sunna leh chawimawina hun atan an hmang ta \hin a ni.
Police Commemoration Day hmanna pui ber National Police Memorial, Chanakyapuri, New Delhi-ah Mizoram Police aiawhin Flag Bearers H/C Lalsangmawia leh Const. R. Lalnunpuia te an tel a. Mizoram-ah pawh tukin khan Mizoram Police, an duty laia hmelma kut tuara thi tawhte hriatrengna ‘Martar Thlan’, 1st Bn. MAP Headquarters-a siamah DGP leh Police Officer dang ten pangpar an dah bawk a ni.

Comments

Chhiar Hlawhte