ICAR Mizoram Centre leh Fisheries Deptt. in Serchhip District-a Lui an zirchiang

Indian Council of Agricultural Research (ICAR), Mizoram Centre leh Fisheries Department \angkawp chuan tunkar chhung khan Serchhip District chhunga Lui te a hmunah kalin an zirchiang a. Mizoram-a lui Sangha chi ruk (6) te chu boral mai thei dinhmun ah an ding tih an sawi.

He zirchianna ah hian PL. Lalrinsanga, Fishery Scientist, ICAR, Mizoram Centre, Kolasib chuan Lui hrang hrang zirchinga hma an hmalak dan te sawiin, lui hrang hrang an zirte chu a tui leh lei sample te lain, zirchian chhunzawm anih tur thu a sawi a. Mizoram lui Sangha te nasa taka tih chereu anih avanga kan ram lui sangha chi 6 lai chu boral (extinct) mai thei dinhmunah an ding nia sawiin, Nghavang (Semiplotus modestus) leh Nghahrah (Tor tor) te pawh chung zingah chuan an tel niin a sawi.

He zirchianna hian a tum ber chu kan ram luidunga tui leh leilung dinhmun zirchian te, Sangha boral mai thei leh inthlah pung chaklo bikte, tunlai thiamna leh hmanrua te hmanga hmun danga chi inthlahpun tir a, chung Sangha chite chu an awmna hmun ngaia chhuah leh te, kan ram luidung nungchate nasa zawka an lo pun theih dan tur te leh humhalh kawnga nasa zawka hma lakna tur a nih thu PL. Lalrinsanga chuan sawiin, Nghavawk chikhat, hmun dang a awm lo a ngaih hmuh an neih chu chik zawk a zirchian tur a dah a ni bawk.

Serchhip District Fisheries Development Officer (DFDO), Zonuntluangi pawhin hetianga kan ram lui te zirchiang tura Mizo mithiam kan nei chu lawmawm a tih thu leh Serchhip District chhunga YMA Branch \hahnem takin anmahni khua \heuhah theihtawp chhuaha luidung humhalh kawngah nasa taka hma an lak mek thu sawiin, tuna mithiamte hmalakna chungchang ah pawh Branch YMA hrang hrang te'n an humhalh lui te phal taka an lo hman tir avangin Branch YMA te chungah lawmthu a sawi a. YMA te avangin kan luidung ruak tak tak tawhte pawh an lo hlu thar lehin Nungcha chi hrang hrang kan hmuh ngai tawh loh tur emaw kan tih chen a, hmuh tur kan neih phah leh ta chu lawmawm a tih thu pawh sawiin, an zirchianna-a lo puitute chungah lawmthu a sawi bawk.