Kan ram leh hnam zahawmna atana intodelh turin theihtawp kan chhuah a ngai - LAD Minister

LAD Minister, K. Lalrinliana chuan intodelh turin theihtawp kan chhuah a ngai tih sawiin, “Kan ram leh Hnam zahawmna atan a pawimawh em em a ni,” a ti.
Local Administration Department in Pawlrang khua bawlhhlawh awmze nei zawk a sawngbawl kawnga hmalakna, Solid Waste Management bul\anna tur, Model Village-a a puan denchhena nimin a buatsaih a hmanpuina LAD Minister chuan ei leh bara kan la intodelh hleithei lo chua veiawm tih sawiin, keimahni thar ngei buhfai lei tumin sawrkarin ruahmanna a siam thu a sawi a. Hetihlai hian kan buhfai thar ration atana sem tham tharchhuah kan la nei theilo chu Chief Minister leh Agriculture Minister te pawhin an vei em em tih sawiin, “An \hahnemngaihna avangin Agriculture Department pawhin buh thar tam turin nasa takin \an an la a, hei hian rah \ha a chhuah ngei a beiseiawm a ni,” a ti a. Buhfai bakah sa leh thlai ah pawh kan la intodelh lo nasa tih sawiin, “Ramchhunga kan tharchhuah aiin ram pawn a\anga kan lakluh hi a tam zawk hle a, ram pawn a\anga kan lakluh a la ngaih reng avangin ramchhunga pawisa leng vel tur pawh rampawn-ah a luang chhuak reng a, hei hi hma kan sawnna daltu lian ber pakhat a ni,” a ti a. “Intodelh turin theihtawp kan chhuah a ngai a, kan ram leh hnam zahawmna atan a pawimawh em em a ni,” tiin hei hi naupangte a\ang kan inzirtir a \ul tih a sawi a. “Kan pi leh pu te khan kuthnathawh an zahpui ngai lova, keini an thlah te hian kan chhawm nun zel a ngai a ni,” a ti bawk.
LAD Minister chuan Pawlrang khua in bawlhhlawh \awih thei leh \awih theilo thliarhran kawngah leh faina kawnga an hmalakna ropui a tih thu pawh sawiin, “Ram changkang zelah faina hian ngaihpawimawh a hlawh a, sawkar laipui pawhin \an a la nasa hle a, hei hian rah \ha a chhuah mek zel a ni,” a ti a. Mizote pawh tunhma a Hnam bal ber pawla sawi kan ni \hin thu leh tunah erawh faina kawngah hma kan sawn in India ramah pawh Hnam fai pawl a chhal ngam kan nih tawh thu leh Kristianna hian faina a ken tel ve bawk avangin kan inhmeh hle tih a sawi bawk.
Pawlrang khua hian kum 2016 December thla a\angin bawlhhlawh \awih thei leh \awih theilo an thliar hrang \an a, kum 2017 khan Champhai District-a Village Council hna thawk \ha ber pahnihna lawmman lain kum 2018 khan Champhai District a ram kang ven kawnga hna thawk \ha ber lawmman an dawng bawk a. Kumin hian Swachh Bharat Mission hnuaiah Champhai District a hma la \ha ber lawmman an dawng bawk a ni.

Comments

Chhiar Hlawhte