Zohnahthlak Mizoram-a kal turte harsatna sawiho

Joint Welfare Action Committee (JWAC) Tripura leh Assam-a Zofa chi peng hrang hrang inzawmkhawm te leh MZP hruaitute chuan nimin khan Aizawl-ah inkawmna neiin he hun hi MZP General Hqrs. President, L. Ramdinliana Renthlei chuan a kaihruai a ni.
MZP General Hqrs. President Room-a he inkawmna ah hian Joint Welfare Action Committee (JWAC) Tripura leh Assam-a Zofa chi peng hrang hrang hruaitute chuan, tunhnaia Vairengte Checkgate-a kan unau ten ILP pekchhuah chungchang a harsatna an neih thu te, kan unau Hrangkhawl Hnam Aizawl-a kal tur Vairengte Police in ILP an lo dil a, an nihna an sawi chung pawh a an hriatthiam duh loh thute leh an haw tir leh thu te an sawi a. Vairengte Checkgate-a Police duty te thil tih dan chu an hriatthiam loh thu te an sawi a, Duhlian \awng a harsatna nei kan unaute zingah an awm thu leh Vairengte Checkgate-ah harsatna an tawh \hin thu te, hetiang a nih chuan kan Hnam inpumkhatna a tihchhiat theih thu te sawiin, MZP in Zofa chi peng hrang hrang insuihkhawm nana hma a lak \hin danah lawmawm an tih thu an sawi a, a theih ang anga thawhpui turin MZP te an sawm bawk.
He hunah hian MZP President, L. Ramdinliana Renthlei chuan khawvel hmun hrang hrangah Zofate kan awm thu sawiin, “Kan \awng te a lo danglam tawh a, \awng avanga unau kan nihna hi bo a ni lo a, \awng te hi lo inanglo deuh mahse Chhinlung chhuak, Chhulkhat kual kan ni a, Thisen avanga in unau kan ni zawk tih kan hriat hi a \ha hle a, hemi kawngah hian theihtawp kan chhuahtlan a ngai a ni,” a ti a. Zofa chi peng hrang hrang te kan insuihkhawm theih nan leh lungrual taka kan awm theih nan MZP chuan hma an la zel dawn tih sawiin, “Kan unau harsatna nei te chuan Zofate Inpui MZP-ah lo tlanlut zel turin kan sawm che u a ni,” a ti.
Tunhnaia Vairengte Checkgate a kan unau ten harsatna an tawh chu an lo hriat thu leh an theihna chin chin ah hma an lo lak tawh thu leh a \ul angin thuneitu sang lama an lo thlen dawn thu MZP President chuan sawiin, “MZP in Hnam inpumkhatna tura nasa taka kan beih lai leh hma kan lak mek laia hetiang ang kan unaute chungah a thleng leh \hin hi pawi kan ti hle a, kan thuneitute pawhin a rang lama min enfiah sak tur leh hetiang a thlen tawh loh nana hma min laksak turin kan ngen nghal bawk a ni,” a ti bawk.
Nimin a he inkawmna a tel Joint Welfare Action Committee (JWAC) Tripura leh Assam a Zofa chi peng hrang hrang hi Molsom hnam te, Hrangkhawl hnam te, Chorei hnam te, Sakachep hnam te, Kaihpeng hnam te leh Ranglong hnam te inzawmkhawmna pawl an ni.

Comments

Chhiar Hlawhte