YMA General Conference vawi 72-na zawhfel a ni

Mizoram-a tlawmngai pawl lian ber, Young Mizo Association (YMA) inkhawmpui lian, YMA General Conference vawi 72-na chu nizan hmasa khan zawhfel a ni ta.

YMA General Conference hi North Vanlaiphai-a ‘Chhurbura Run’ ah neih niin Palai 4000 chuang an kal a, nizan hmasa khan Palai thlahna hun chu Central YMA Vice President, R. Lalngheta kaihhruaia neih niin Pandal-a leng lo mipui an inkhawm a. He hunah hian Central YMA President \anglai leh President atana thlan thar, Vanlalruata chuan thu a sawi a ni.

YMA General Conference-ah hian Ningani khan kum 2019-2021 chhunga Central YMA hruaitu tur thlanna neiin President \anglai Vanlalruata, Tuikual South chu President atan hneh taka thlantlin leh niin ani hian Vote tla 2498-ah vote 2337 hmuin vote tla zawng zawng a\anga za zela 94 zet a hmu a. General Secretary \anglai Lalhmachhuana, Chaltlang Lily Veng chu Vice President thar atan thlan niin Vote tla 2521-ah Vote 1347 (53%) a hmu a. General Secretary-ah Prof. Lalnuntluanga, Khatla West thlantlin niin Vote tla 2457-ah Vote 819 a hmu bawk. Asst. Secretary atan Dr. Malsawmliana, Vaivakawn chu thlantlin niin ani hian Vote tla 2419-ah Vote 800 a hmu a, Treasurer atan Fabian Lalfakawma, Chawlhmun chu thlantlin niin Vote tla 2238-ah Vote 1136, za zela 51 hmuin thlantlin a ni a, Finance Secretary atan Roneihthanga, Nursery chu thlantlin niin vote tla 2200-ah vote 859, za zela 39 a hmu bawk a ni.

YMA General Conference hi Nilaini zan khan Chief Minister, Zoramthanga chuan khuallian nia hmanpuiin mi \henkhatin Mizote kan fellohna leh \hatlohna kan sawi uar mah mah \hin tih sawiin, a \ulna chin chu awm mahse ram leh mipuite tibeidawng khawpa kan chaklohna leh kan fellohna sawi a hlauhawm tih a sawi a. Zoram nula leh tlangval, Zoram mipui baal hma a \hing\hi ngailo tam tak, ram leh hnam theihtawpa siam \hat tum an awm thu leh, Zoram siam\ha turin anni hi Pathian in a duangin a buatsaih mek tih a sawi a. Keini in kan fellohna kan hmuh tam em em lai hian ram pawn a\anga Mizoram rawn tlawhtute chuan Mizote min fak em em \hin thung si niin a sawi bawk.

Hei bakah hian Chief Minister chuan Mizoram chu rambuai vangin hun thim chhah tak kan tawn thu leh ram ralmuang leh zalen kan nihna pawh kum 30 deuh chauh a la tih sawiin, heti chunga kan hmasawn dan hi chhinchhiahtlak a ni a, hei aia chak zawka hmasawn kan tum zel ang a, a chhe lai ringawt thlir lova a \ha lai thlir zelin ke kan pen dawn a ni, a ti a. Pathian in Mizoram min kaihhruai dan thlirin Mizote hi eng turin leh midangte entawntlak ni turin min buatsaihin min duang mek a ni tih pawm a, theihtawp chhuah a rilru dik pu a hmalam pan zel turin Zoram mipuite a sawm bawk.