School Education Minister hovin MZP dincham ah ‘Zirlaite Ni’ hman a ni

Mizo Zirlai Pawl (MZP) chuan nimin khan Zirlaite Ni chu Dawrpui Multipurpose Hall-ah an hmang a, he hun hi School Education Minister, Lalchhandama Ralte chuan a hmanpui a ni.

Nimin a Zirlaite Ni hmanpuitu School Education Minister, Lalchhandama Ralte chuan Zirlai zawng zawng tana Zirlaiten Ni an neih chu hlut taka kan hman thiam a ngai tih sawiin, “Zirlaite Ni hi kum dangah chuan Mizoram School zawng zawngin kan hman theih nan ruahmanna felfai zawk sawrkar in a siam dawn a ni,” a ti a. Mizoram sawrkarin zirna a ngai pawimawh a, Zirna chu a lailumah a dah tih sawiin, “Education Budget pawh zaa 24 a tihpun a ni a, zirtirtu mamawhna a sang tih hriaiin sawrkarin zirtirtu 881 tunhnaiah \umkhatah a la a, hei hi sawrkarin zirna a ngaih pawimawhzia lantirna a ni,” a ti. Zirlai kalkhawmte chu ram mamawh chhanna ni tura sawmin, Zirlaite chuan Mizo mipuite thinlungah hmun pawimawh ber an chan a \ul takzet tih a sawi a, “Nu leh pa te hian zirlaite aia dah pawimawh hi kan nei tur a ni lo a ni,” tiin tunlai khawvel ah chuan a thiam thiam leh a chhawr tlak apiang an ding chang \hin tih a sawi. School Education Minister chuan tunhnaia zirtirtu lak danah diklo a awm lo tih sawiin, Recruitment zuizuiin hna an la tih a sawi a, “RMSA/SSA hnalak chungchangah pawh kum 2015-a Sawrkar hmasa in hnaruak hnawhkhah dan tur Rulses a lo siam zuizui a la mai kan ni,” a ti bawk.

He hunah hian MZP President, L. Ramdinliana Renthlei chuan Zirlaite Ni hi kum 2006 a\anga hman \an a nih thu sawiin, MZP chu Oct. 27, 1935-a din a nih thu a sawi a, an dinchampha Zirlaite Ni-a puan saktu Mizoram sawrkar chungah lawmthu a sawi a. “MZP hi ni 27th October 1935 khan din a ni a, kum 84 zet mai Pathian in min kaihruai hi a lawmawm takzet a, MZP hian a din tirh a\angin zirlaite leh ram leh hnam tan hna nasa takin hna a lo thawk tawh \hin a, a la thawk chhunzawm zel dawn bawk a ni. Mizo zirlaite kan chanvo min chuhpuitu kan chhehvel-ah an lo pung tual tual ta a, Mizo zirlaite kan \an mar sauh sauh a ngai a ni. Mizo zirlai ten kan chanvo kan chan chhunzawm zel theih nan MZP chuan hma a la chhunzawm zel dawn a, kan chhehvel hnam hrang hrang mim chimral theitu laka Mizo zirlaite te kan inven uluk a ngai hle a ni,” tiin “Eng pawh ti dawn ila, ‘ka ram leh hnam tan a him em’ tiin ngaihtuahna seng hmasa ila, kan tisual ngai dawn lo a ni, hei lo hi hmangaih tur ram leh hnam dang kan nei si lo,” a ti bawk.