Sangha Dil beitu mi 2 man

Niminpiah (Pathianni) khan Serchhip P&E Veng Tuikum lui bula T. Lalnunsanga Sangha Dil chu mi pahnih in Bomb hmanga beiin Sangha man an tum a, heng mi pahnih te hi man nghal an ni.

Thudawn danin Serchhip P&E Veng-a cheng, T. Lalnunsanga hian Serchhip leh Vanchengte inkara Tuikum lui, ke-a kal kaina bul lawkah Sangha Dil hi neiin a bul lawkah hian Buh an ching bawk a, Pathianni khan an Buh veng tur hian kalin hetihlai hian heng mite hian an Sangha Dil hi Bomb hmang hian an lo bei a, hei hi zuk hmuin thuneitute hriattir an nih hnuah Serchhip Police te chu Dil-ah hian kalin pawikhawihtu hi man nghal an ni.

Sangha Dil beitute hi Lalremtluanga (33), Lungpho khua, tuna New Serchhip North-a cheng mek nia insawi leh Joseph Zothanpuia (18), New Serchhip Venglai-a cheng nia insawi te an ni a, tunhnai rei vaklo a\anga Serchhip-a rawn awm an nih thu pawikhawihtute hian an sawi. Heng mite hi Serchhip Police te chuan IPC Section 435 tlawhchhan leh dan lo-a puakthei thil an hman avangin, Explosive Substance Act leh Explosive Act te tlawhchhan in thubuai an siamsak nghal a, nimin khan Court-ah hruai nghal niin Serchhip District Jail-ah dahluh nghal an ni.

Hetihlai hian Serchhip District Fisheries Association hruaitute chuan nimin zing khan Serchhip Police Station-a Officer Incharge chu a Office-ah kawmin mi Sangha Dil-a Sangha te Bomb hmanga beitute hi a na thei ang bera hrem an duh thu an thlen a, hetianga Sangha Dil in khawih sak \hin chu pawi an tih thu sawiin, hetiang hi lo tuar ve an awm a nih chuan an hnena hriattir \hin tur leh anni pawhin theihtawp chhuaha hma an lak pui tur thu an sawi bawk.