LPS Youth Icon ten YMA kutah cheng nuai thum an hlan

LPS Youth Icon 2024-a Top 10- te chuan tunhnaia ruahsur nasa avanga Serchhip-a chhiat tawkte tanpuina atan nimin (June 18, 2025) khan Sub-Hqrs. YMA Serchhip hnenah cheng nuai thum (3) hlanin nimin khan semchhuah nghal a ni.
LPS Youth Icon 2024-a Top 10 te hian tunhnaia ruahsur nasa avanga chhiat tawk te tanpuina atan hian Charity Concert buatsaihin heta an sum hmuh atang hian cheng nuai thum (3) chu nimin khan Sub-Hqrs. YMA Serchhip kutah an hlan a. heng tanpuina sum hlan tur hian Youth Icon 2024-a Top 10 atangin mi pali te chu Serchhip-ah kalin Sub-Hqrs. YMA Serchhip Office-ah Secretary Zonunsanga Kawlni leh Fin. Secretary H. Lalbiak-hlua ten lo dawngsawngin sum hi an hlan a ni.

Serchhip Sub-Hqrs. YMA te chuan he tanpuina sum an dawn hi tunhnai ruahsur nasa avanga Serchhip Town chhunga chenna In chhia mi 20 te hnenah nimin vek khan Rs. 15,000/- theuhin an hlan nghal a, YMA hruaitute leh Youth Icon Top 10 atanga rawn kal te hian Dinthar Veng, Saron Veng, Field Veng, P&E Veng, Chhim Veng leh Chanmari Veng-a vanduaina tawk te hi kalchilhin tanpuina sum hi an hlan a ni.

Serchhip Sub-Hqrs. YMA chuan hetianga LPS Youth Icon Top 10 te leh LPS Vision ten Serchhip-a vanduaina tawkte tana sum tam tak an rawn hlan chu lawmawm an tih thu an sawi a ni.