Mizoram-ah ruihhlo khawih, inchiu thin 14,378 awmin kum 28 atanga kum 32 inkar an tam ber

Mizoram-ah ruihhlo khawih, inchiu thin 14,378 awmin heng zingah hian kum 28 atanga kum 32 inkar an tam ber.

Nimin khan Aizawl-a Taxation Department Conference Hall-ah Mizoram State AIDS Control Society (MSACS) buatsaihin 'Seminar on Drugs Abuse' chu neih a ni a, he hunah hian Mizoram-ah ruihhlo khawih, inchiu thin mi 14,378 an awm thu tarlan a ni a, he hun kaihruaitu Mizoram State AIDS Control Society (MSACS) Project Director Dr. Jane R. Ralte chuan MSACS chhinchhiah danin Mizoram-ah Drugs addict, nitin-a inchui thin mi 5,298 an awm thu tarlang bawkin, Aizawl District-ah 2,701 awmin an tam ber a, Khawzawl District-ah 35 awmin an tlem ber thu a sawi a. Dr. Jane R. Ralte chuan damdawi-a inchiu thinten natna chi hrang hrang an inkaichhawn loh nan leh an hriselna nghawng chhe chak lutuk tur ven kawngah MSACS chuan Opioid Substitution Therapy, Condom Promotion leh Syringe Needle Exchange Program te a kalpui thin thu a sawi a. Opioid Substitution Therapy (OST) chu ruihhlo chakna laka chhawktu damdawi a ni tih sawiin, OST tha taka an lak avanga lehkha zir chhunzawm theite, pangngai taka hna thawk chhunzawm theite leh mi hmantlak ni leh thei hial te an awm thu a tarlang a. MSACS hnuaiah ruihhlo ngaite tan Targeted Intervention (TI) Project 30 leh Link Worker Scheme Project 8 an kalpui thu a sawi bawk a ni.

Nimin-a he hun hman hi Health Minister Lalrinpuii chuan chuan khuallian nia hmanpuiin ruihhlo do kawngah tha thlah theih a nihloh thu a sawi a, ‘Ruihhlo tel lo Mizoram’ kan neih theih nan ruihhlo lut tur ven (Supply Reduction) leh ruihhlo hmangtu titlem tura hmalakna (Demand Reduction) leh ruihhlo nghawng tha lo siamthat hna (Harm Reduction) sawt zawka thawk tur chuan Department hrang hrangte tanrualna a pawimawh thu a sawi a. World Health Organisation (WHO) chuan ruihhlo ngawlveina chu natna tihdam theih a nih thu an sawi thu leh he natna tidam tur hian mithiamte rawn nachang hriat a pawimawh thu a sawi bawk. 

He hunah hian SHALOM-a CEO Dr. Chawnglungmuana tarlan danin Mizoram-ah ruihhlo (drugs) hmansualna chu kum 1980 vel atangin a intan chho a, kum 1990 chho ah Proxyvon hmansualna intan chho lehin ruihhlo-a inchiu thin zingah Hepatitis vei 90% an awm thu a sawi a. Zirlai naupangte zingah khuh damdawi leh energy drink nena pawlh thin an tam tih a sawi bawk.