Ruihhlo hmansual leh tawlhruk dona Ni pualin Serchhip-ah hun hman a ni

Khawvel puma Ruihhlo hmansual leh tawlhruk dona Ni, ‘International Day Against Drug Abuse and Illicit Trafficking’ chu nimin khan ram hrang hrangah hman a ni a, Serchhip-ah pawh Police Department leh Excie & Narcotics Department te chuan he ni pual hian hun an hmang a ni.

International Day Against Drug Abuse and Illicit Trafficking pual hian Serchhip-a Police Department chuan nimin chawhma dar 11:00 khan Serchhip Sailiamkawn atanga Serchhip SP Office thlengin ‘Two Wheeler Rally’ an buatsaih a, he hunah hian Serchhip Police te bakah sawrkar Department hrang hrang leh zirna In-a thawktu telin an vaiin mi 80 vel zet an tel a, Serchhip Sailiamkawn-a Police check Post atanga kawng hi zawhin Serchhip Bazar paltlangin Serchhip SP Office Tual-ah Rally kharna hun hman a ni a, he hunah hian Serchhip SP, Gavit Gogna IPS chuan he Rally-a tel Department hrang hranga thawktute chungah lawmthu sawiin, kan ramah ruihhlo hmansualna leh tawlhrukna a hluar thu a sawi a, chhuan lo la awm zel turte tana chenna tlak a nih theihna turin ruihhlo hmansual leh tawlhruk dona kawngah kan vai-a kan tanrual a tul thu a sawi bawk a. He huna tel te hian Serchip SP kaihhruaina in he ni puala thutiam an chham rual bakah an hming an ziah hnan bawlk a ni.

‘Two Wheeler Rally kharna hun hi Serchhip SP Office-a Officer Inspr. Ramhluna chuan kaihruaiin Serchhip SDPO, PB. Singh pawhin thu a sawi a, International Day Against Drug Abuse and Illicit Trafficking puala Rally-a tel te chungah lawmthu sawiin, kan ramah ruihhlo a hluar tawh thu leh chhungkaw hrang hrangte pawhin a nghawng kan tawrh mek thu a sawi a, he ni kan hman hian ruihhlo hmansual dona leh tawlhruk dona kawngah theihtawp chhuaha tantlan a tul zia min hriat thar tir se a duh thu a sawi bawk.

Serchhip-a Excise & Narcotics Department te pawhin International Day Against Drug Abuse and Illicit Trafficking pual hian nimin chawhnu khan Govt. Higher Secondary School, Serchhip-ah ruihhlo thatloh zia inzirtirna hun an buatsaih a, he hunah hian END Serchhip Station-a OC R. Lalrinsanga leh SI B. Lalengmawia ten zirlaite hnenah ruihhlo in a huamchin te leh ngawlveina a lo awm thin dan te sawiin, ruihhlo ngawlvei te hian a tirah ngawlvei tura an inrin loh laiin an tih chhin hnuah a ngawl an vei tak thin thu te an sawi a. Hei vang hian ruihtheih thil chi hrang hrangte chu tichhin lo tura fuihin ruihhlo dona kawnga an hmalak dan te an sawi bawk.