MSHCS in NGHAM thuchhuah an sawifiah

Mizoram State Health Care Society (MSHCS) chuan Non-Government Hospital Association, Mizoram (NGHAM) in an dinhmun hrang hrang tarlanga thuchhuah an siam chu an sawifiah.

Nimin-a MSHCS in thuchhuah an siamah hian MSHCS chuan NGHAM ten Cashless avangin nitin sum lut awm lo tura an ngai chu Sawrkar lam chuan cheng nuai 50 advance a pek a inhuam thu leh kartin damdawi In bill hi pek thin a nih avangin an buai lo turah an ngai tih an sawi a. MUHCS rate chu 50%-80% vela hniam zawk anga sawi pawh hriatchian loh vang nia a lan thu sawiin, entirna atan Rilphir zai chungchang an tarlang bawk.

Rate chungchang sawifiahna atan entirna tarlangin, “Aizawl chhunga Private damdawi In lian atanga MSHCS in kum hmasa lama claim a dawn atanga chhutin, Rilphir zai (Appendicectomy) senso chu chawhrualin Rs. 36,250/- (room luah man telin) a ni a. MUHCS hnuaiah hian Rilphirzai hi Base rate Rs 25,000/- tih ni mahse heng damdawi In lianah hian additional incentive an dawn tur zat nena belhkhawmin he Rilphir zai package rate hi Rs.32,500/- atanga Rs.35,000 thleng a ni thei a. Damlo chu a entitlement a zirin Cabin-ah emaw, Semi Cabin-ah a awm anih chuan room man hi he package rate tarlan piah lamah hian damdawi In ten an bill belh thei bawk. Chuti chuan Room luah man nen chuan Rs 36,250 ai hian a sang zawk dawn a ni,” an ti.

Heng bakah hian Phai lam Hospital leh Mizoram Private Hospital te chu Rate chungchangah te, Quality chungchangah te, Grading chungchangah te khaikhin chi a ni lo tih pawh MSHCS thuchhuah chuan tarlangin, “Chutichung chuan Sawrkar chuan Mizoram Private Hospital te chu duat takin Phai lam Hospital te nen rate inang tlang a offer bakah, hemi piah lamah pawh hian sawipui a la inhuam cheu a ni,” an ti a. Phai lam Non-empanelled Hospital te Reimbursement phalsak anga sawi pawh a dik ziktluak lo bawk a ni tih sawiin, “MUCHS guidelines 3.12.2/10.3.2 ang chuan emergency-ah emaw Empanelled Hospitals ten an enkawl theihloh natna bikah chuan Phai emaw, Mizoram chhung pawh nise Non-empaneled Hospital-ah chuan reimbursement theih reng a ni,” an ti bawk.

MHCS chuan mipui nawlpui, a bikin mi harsa zawk te leh sawrkar hnathawk tam takte chuan damloh nikhuaa inkhul chhuahna tur sum an neih loh dan te, pukchawp-a inkhul chhuak te leh mahni In leh lo hial tihral ngai khawpa mangang te an awm thin tih a hriatpui avangin Sawrkar chuan cashless-in Mipui Healthcare hi a kalpui mek tih an sawi a, “Hei hi Sawrkar chuan mipui tan tha a ti hle a ni,” an ti a. “Sawrkar chuan mipuite hmakhua ngaiin Private Hospital te nen inrawn tlanga, dawhkan khat kilho a inbiakremna kawng zawn zel hi a duh dan a ni,” an ti bawk.