'Emmy Awards' dawngtu Team zingah Mizo pahnih tel

Khawvel-a Journalism chawimawina ropui 'Emmy Awards' chu June 26, 2025 khan sem-chhuah niin 'Emmy Awards' dawngtu Team zingah Mizo pahnih an tel.

He chawimawina dawngtu BBC Team-a Mizo hming lang pahnih hi Mizo Journalist - HC. Vanlalruata leh Isaac Zoramsanga te an ni a, Emmy Awards Palladium Times Square, New York City atanga semchhuah Emmy Awards-ah hian, 'Myanmar’s Civil War' tih thupui hmanga BBC in an buatsaih short-form documentary hian National Academy of Television Arts & Sciences (NATAS)-in News & Documentary Emmy Awards, vawi 46-na a buatsaihah Outstanding Continuing News Coverage-Short Form category-ah award an dawng a ni.

Mizo journalist pahnihte hi BBC tana Project-ah hian Field Producer hna an thawk a, Myanmar chhimlam Chin State-a ni 10 chhung Reporting Mission an neih chhungin, Ground-Level Support pawimawh tak tak an thawk a. An hnathawh hian BBC Team-in hmun ril leh thuk zawk, hnam sipai leh Myanmar Sipai junta-te inkahna hmunte, hnam sipai inbunna hmunte an luhchilh theih phah a ni.

Minute 6.5-a rei he documentary hian tual-chhung hnam sipai pawlte'n hmun engemaw zat atanga sipaite an hnawhchhuah dan a entir a. Chutih rualin, Junta-in hnam sipai pawl tihtawp leh thalaite ralthuam hmanga an tihduhdahna, rukbo leh thah chungchanga report lungchhiatthlak tak takte pawh a pholang bawk. HC. Vanlalruata leh Isaac Zoramsanga te hi All India Radio-ah Editor an ni ve ve a ni.

Chief Minister Lalduhoma chuan International Award hlu tak The Emmys Award dawngtu HC. Vanlalruata leh Isaac Zoramsanga te a chhuangin a lawmpui tih nimin khan Social Media kaltlangin a sawi nghal bawk a ni.