Rel kawng thar Prime Minister in a hawn beisei a ni

Kilometre 51 leh metre 38-a thui Bairabi leh Sairang inkar Rel kawng chu Prime Minister Narendra Modi-a'n a hawn rin a ni.

Northeast Frontier Railway (NRF) hotute chuan helai Rel kawng hi siam zawh tep a nih tawh thu leh a remchang chuan Prime Minister-in a hawn ngei an rin thu an sawi a. Mahse, Ministry of Railways atanga thu chiang a awm hma chuan an la sawi fak theih rih lo niin an sawi. Tarlan tawh angin Commissioner of Railway Safety (CRS) Northeast Frontier Circle Sumeet Singhal chuan June ni 6 leh ni 10 inkar chhung khan Hortoki leh Sairang Rel Chawlhhmun inkara Rel kawng a him tawk leh him tawk loh hi uluk takin a endik a. A him tawkah a ngai nia thudawn a nih laiin a report thehluhna Ministry of Railways in a pawm leh pawm loh hriat a la ni lova, an puan thuai beisei a ni. 

Commissioner of Railway Safety (CRS) Northeast Frontier Circle Sumeet Singhal hian nikum July thla khan Bairabi leh Sairang inkar rel kawng him leh him loh a endik tawh a, a him tawk ti a report a pek chu Ministry of Railways chuan nikum vek August thla bul lam khan a lo pawm tawh a ni.

Cheng vbc. 5,021.45 ruahman hmanga hnathawh Bairabi leh Sairang inkar Rel kawng lian hnathawhna atan hian sum za zela 97 hman a ni tawh a, a taka thawh chin hi za zela 94.5 a ni tawh bawk a. Ministry lam pawhin hna hi thawh zawh tep a nih thu leh chak taka thawh chhun-zawm zel a nih thu an sawi a. July thla chhung hi chuan hawn theiha zawhfel vek hman an beisei a ni.

He Rel kawng siam hna hi ‘National Project’ atan kum 2008-09 khan puan a lo ni tawh a. November ni 29, 2014 khan Prime Minister Narendra Modi chuan he project bultanna lungphum phumin a hun takah erawh zawh theih a ni ta lo thung a ni.