Electric Bill chungchang MCU leh P&E in sawiho

Tunlai-a Electric Bill chungchanga sawi neuh neuh awm chung-changah Zirtawpni khan Power & Electricity Department Officer te leh Mizoram Consumer Union Headquarters, Aizawl Office Bearers te chu P&E Engineer-in-Chief Office-ah an inkawm.

He inkawmna ah hian Billing software kan hman lai mek SAP chu a tunlai (up-to-date) tawh loh bakah, tunlaia information kan duh ang min pe thei tawh lo tih sawi sawilan a ni a, hetihlai hian Central Sawrkar in RDSS Scheme hnuaiah Software changkang tak, IT/OT Sofware, mipuite mamawh information pe thei leh mipuite tana hman awlsam tur siamin hemi hmang tur hian hmalak mek a nih thu leh tuna kan hman lai khawl hlui (SAP) atanga khawl thar (IT/OT)-a Consumer Data insuan (transfer) chhung a rei deuh avangin Consumer Meter Reading a hun takah lak theih a nih loh avanga Department in pawi a tih thu an sawi a ni.

He hunah hian Bill reading lak tlai avanga Rate sang zawk anga mipuiin Bill chawi belh nia an inhriat te, an chawi tam phah loh nana Department-in Pro-rata hmanga Bill hun dik taka Bill angin siamrem sak an nih thu te inhrilhfiah a ni a. Hetihlai P&E Department hotute chuan an hmanrua te chu khawl thil a ni a, engemaw thil fello a awm a nih pawhin Department chuan Consumer-te complain hi tha taka lo dawngsawngin hmalak nghal zel an tum thu an sawi a. Tuna an Billing Application (PEDM Consumer App)-ah hian mahni In atanga complain mai theih a nih thu te inhrilhfiah a nih bakah P&E Officer ten rang taka App kaltlangin an harsatna te sutkianpui theih a nih thu te sawiho a ni.

P&E Department hotuten entirna pe-a an tarlan danin Bill reading lak tlai avangin thla hnih (2) chhunga Unit hman zat Unit 300 lo ni ta se, Bill chhut dan pangngai ah chuan Unit 100 chu rate hniam a bill tur niin Unit 200 dang chu rate sang zawka bill tur a ni tih an sawi a. Mahse Pro-rata hmanga chhut a nih avangin thlakhat ang zela siam rem niin 1st 30 days-ah Unit 100 rate hniam, Unit 50 rate sang leh 2nd 30 days-ah Unit 100 rate hniam, Unit 50 rate sang a ni tih an sawi a. “Hetiang hi a nih avangin thlakip a chawi dan tur anga siam vek a ni a, amaherawhchu, thla hnih bill vawikhatah a kal avangin Electric bill hi a lang sang ta a ni,” an ti.

Power & Electricity Department hotute leh Mizoram Consumer Union hruaitute hian Power & Electricity Department Corporation-a in leh dan tur chungchang pawh an sawiho bawk a. Tunah hian Power & Electricity Department hi Corporation-ah lut turin hma lak zel a ni a, a bul tan nan Power & Electricity Department chu Strategic Business Unit (SBU) pathum - Generation SBU, Transmission SBU leh Distribution SBU ah then (unbundling) phawt tura hmalak a ni a, heng te hian a hrang theuhin hma an la tawh dawn a ni.