Thla khat chhungin Mizoram-ah leimin vanga In chhia leh chim 281 zet a awm hman

Thla khat kalta, May 24, 2025 atanga nimin June 24, 2025 chhung khan Mizoram hmun hrang hrangah leimin avanga In chhia leh In chim 281 zet chhinchhiah awmin heng chhiatna thleng kaihhnawih ah hian mi 5 an thi a ni.
State Emergency Operations Center (SEOC) in tunhnaia chhiatna thleng an chhinchhiahna atanga a lan danin thla hmasa May 24, 2025 atanga nimin, June 24, 2025 thleng khan Mizoram-ah ruahsur avanga leimin leh lei tawlh chhinchhiah 804 zet a awm a, District hrang hrang zingah Champhai District chu leimin tamna ber niin leimin 229  zet chhinchhiah a ni a, Serchhip District in dawtin leimin leh lei tawlh 142 chhinchhiah a ni a, Aizawl District-ah pawh hmun 124-ah chhinchhiah a ni bawk.

Hemi hun chhung hian ruahsur nasa leh a kaihhnawih avanga In chhia leh In chim pawh Mizoram-ah 281 zet chhinchhiah a awm bawk a, Serchhip District-ah tam berin In chhia leh chim 102 a awm a, Champhai District-ah 40 awmin Siaha District-ah 30 a awm bawk a, Serchhip District-ah hian In rauhsan tam berin 125 zet rauhsan a ni bawk a, Aizawl District in dawtin In 119 an rauhsan bawk a, Lunglei District-ah 37 a awm bawk. Heng bakah hian tuilian avanga In rauhsan 114 awm bawkin Serchhip District-ah tam berin in 60 zet chu tuilian avang hian rauhsan a ni a, Kolasib District-ah 30 leh Aizawl leh Lunglei District-ah 12 ve ve te a ni a. Ruahsur kaihhnawih a chhiatna thlengah mi 5 thi awmin Champhai District-ah mi 3 bakah Aizawl leh Serchhip District-ah mi pakhat ve ve te an ni a, Thlanmual chim hmun thum-ah awmin Electric ban tlu 10 a awm bawk.