Duhdan-a MoU ziahpui thei chauh inrempui duh

Chief Minister Lalduhoma chuan sawrkar in a chhiatpui loh tur leh an duhdan MoU an ziahpui theih chauh inremna siampui an duh thu a sawi.

Nimin khan Chief Minister Lalduhoma hovin Chief Minister Office-ah Empowred Committee on Investment leh sawm bik mi pawimawh te chu an thukhawm a, he hunah hian Chief Minister Lalduhoma chuan tunhmain sawrkar lam chan chhe tur sa rana Company te nena MoU ziah a lo awm tawh thin tih sawiin, “Sawrkarin sum a chawi fo a, han bantir (terminate) duh pawha ban hleih theih loh MoU te pawh a awm. Hetianga sawrkar lam chan chhe sa ran a MoU ziah hi kan sawrkarah hian awm tawh lo se kan duh,” a ti a. “Sawrkarin a chhiatpui loh tur, kan duh dana MoU kan ziahpui theih chauh hi inremna siampui ila, a thei lo chu ziahpui lo mai ila, tih hi kan rilru a ni,” tiin hemi chungchanga sawrkar ngaihdan a sawi a. Chumi hnuah an zirchianna te report an ngaithlain an sawiho nghal bawk.

He Committee hian June ni 11 khan Sawhthing leh thlai dang Processing Unit rawn din duh company pathumte Draft Memorandum of Understanding endiktu tur mi a ruat a. Company te Draft MoU hi sawrkar tan pawm vek theih a nih hmel loh avangin sawrkar duh dan chiang taka tarlanna (Expression of Interest) siam nise, company te hi hriattir thuai nise, a tul chuan Company dang pawh hriattir ni se, an ti bawk. He hunah hian Mizoram Industrial & Investment Policy thlirhona an nei bawk.