Dan lova ram lak tumna duh lo

Lawngtlai District chhung Pangkhua a Village Council leh NGO hrang hrang thukhawm chuan an khaw ramchhunga dan lova zangnadawmna lak tumna chu an duh loh thu an sawi.

Thingsai-Bualpui-Saisih-Pangkhua-Sangau (TBSPS) Road-a Pangkhua ramchhung bik (7.800 km - 29.180km) laih turah he kawng Aligment in a paltlang chhungah khawtlang neitu VC te leh NGOs te hriatpuina tel lova LH.Ramdingliana, RO, Revenue LADC Sangau-in Compensation lak beisei avanga mimal ram pass chhuhsaka ram a lak thu tarlangin, “LADC, Land Revenue & Settlement Department, Sangau-a RO te leh an Staff ten TBSPS Road laih tur-a Aligment-in a paltlang chhungah a ram neitu VC te hriatpuina leh remtihna tel lova Compensation beisei avanga Ram pass tam tham tak an insiam hi tha lo kan tiin cancel ni rawh se,” an ti a. Pangkhua mipui te zingah he Alignment in a paltlang chhunga ram nei mi thenkhatte pass Renew tura tih, Renew tura ram neitu ten pawisa pe a Office an dawr laiin chhuanlam siama Renew sak duh lovin Pawisa pawh an pekir leh hei hi remchang a laa Pass thi tawh anga Cancel sak a mimal ram chhungah Pass thar siam a ni chu pawi an tih thu leh ram neitu dik tak hnena ram pek let vek an duh thu an sawi bawk.

Hei bakah hian TBSPS Road laih tur hi Aligment avanga rei tak a thuanawp tawh lai leh BRO ten Compensation a tam an hlauhthawn avanga kum tam tak harsatna an tawh laia Pangkhua khua leh tui ni lo, Revenue Department-a thawk te leh an laina hnaite ram pek an ni pawh pawi an tih thu an thuchhuah ah chuan tarlangin, ram hma-sawnna tih thuanawp tumna leh ram leh hnam rawkna ah an ngaih thu an sawi a. “Compensation beisei avanga kum 2023-2025 chhunga Revenue Department ten Ram Pass an siam thar zawng zawng te hi cancel ni rawh se,” an ti bawk.