MSCPCR ten Chhingchhip a Sainik School an tlawh

Mizoram State Commission for Protection of Child Rights (MSCPCR) chuan tunhnai khan Chhingchhip-a Sainik School chu tlawhin naupangte dikna leh chanvo humhalhna kawnga hma an lakna hrang hrangte chu lawmawm an tih thu an sawi.
MSCPCR hian Mizoram-a zirna In hrang hrang te tlawhin naupang tan a him em tih leh naupang ten an chanvo dik tak an dawng em tih te a endik thin a. Heng bakah hian Zirtirtu leh Zirlai atanga tihduhdahna a awm leh awm loh te en bawkin tun thla ni 13 khan Chhingchhip-a Sainik School chu an tlawh a, he hunah hian MSCPCR Member pahnih – R Laltanpuia leh Darthakunga hova kalin MSCPCR Superintendent Lallianzuala Chawngthak leh State Child Rights Coordinator C. Lalduhawma ten an tawiawm a. Sainik School Hostel, School building, Mess Room leh Choka te endikin, Complaint Box dah a nih leh nih loh te, nu leh pate tana awlsam taka biakpawhna (helpline) a awm leh awm loh te an en bakah Danin a phut CCTV awm leh awmloh te an enfiah a. A pumpui ah Sainik School hmalakna ah an lawm tih MSCPCR hian sawiin, Block tina CCTV dah a ni chu lawmawm a tih rualin, Floor thenkhata CCTV function mumal lo erawh siamtha thuai turin School thuneitute a ngen bawk.

Tunhnaia an tar, Anti-Ragging/Anti-Bullying lam hawi Poster an hmuhin lawmawm an tih thu MSCPCR chuan an sawi a. La tar zawh loh te pawh tar chhunzawm turin an hrilh a. MSCPCR in hmasawna tura rawtna Principal leh Staff-te hnena a thlen chu hmalak mek a nih thu leh a rang thei ang bera hma an lak chhunzawm tur thu Commission Member-te hi an hrilh bawk a ni.

Sainik School Chhingchhip hi May 15, 2027-a din niin, Class VI atanga XII thleng zirna a awm a, Seat 460 awmin Seat awm zawng zawng atanga 10% hi hmeichhe tan hauh a ni a. Seat awm zawng zawng atang hian 60% chu Mizoram zirlaite tan hauh niin, 40% chu Mizoram State pawn tan a ni thung.