Online-a ILP kalpui thuai a ni dawn tih CM in a sawi

Chief Minister Lalduhoma’n Inner Line Permit (ILP) thih hnua rei tak Mizoram-a chambang an awm thin thu sawiin, ILP chu online hmanga kalpui thuai a nih dawn thu leh ILP thi tawh te a hriat zung zung theih tawh dawn niin a sawi.

Samvidhan Hatya Diwas pual inkhawm niminpiah-a a hmanpuina ah he thu hi sawiin Chief Minister chuan, India Danpui hnuaia hnamdang Mizorama lut tur lo danna, ILP chu khauh zawkin Mizoram sawrkar in a kalpui tawh dawn tih sawiin, Union Home Minister Amit Shah leh Mizoram Governor te hnenah ILP tel lova Mizorama lo lut an tam thu leh an permit tawp hnu pawha rei tak Mizorama la awm te, ILP hmanga Mizorama lo lutte chu an lo luh chhan anga an sawi ni lo, eizawnna dang kalpui an awm a, khualzin anga lo lut, inhlawhfa leh sumdawnna kalpui te an awm avangin Mizo-ram sawrkar chuan khauh zawkin ILP kalpui a tum tih a hrilh a, anni pawn an remtihpui tih a sawi a ni. 

Chief Minister chuan ILP chu online a kalpui turin hma an la mek a, an peihfel tep tawh tih sawiin, online a an kalpui a nih chuan tu ILP nge thi tawh tih te a hriat zung zung theih dawn tih a sawi a, Dan lova Mizorama lo lutte lo khawitute chu Mizo te vek an ni a, Mizote sum leh pai dinhmun tichhetu an nih avangin hetiang laka inthiarfilhim turin Chief Minister chuan mi tin a chah bawk.

Chief Minister chuan Inner Line Permit (ILP) chu tih danglam emaw, tih bo emaw a nih dawn chuan Mizoram sawrkar rawn a ni ang tih sawrkar laipui nen inremna an siam a, hei hi mi tam takin dik lo takin an hrilhfiah thin niin a sawi a, Mizoram sawrkar remtihna tel lo chuan ILP paih a ni dawn lo, a nghet tawk a ni ti a sawi thin chu thudik lo a ni tih sawiin, Mizoram chu remtihna pek ni lovin rawn a ni dawn chauh tih a sawi bawk.