Mizoram Sawrkar in eOffice a hman hnuah file 6,492 kaltirin vawi 63,565 khawih che tawh

Information & Communication Technology (ICT) Department changtu Minister Dr. Vanlalthlana chuan chak zawk leh langtlang zawka sawrkar file-te a kal theihna turin eOffice hman a nih thu sawiin, eOffice hmang hian file 6,492 kaltir a nih thu leh heng file-te hi vawi 63,565 khawih chet tawh a nih thu a sawi.

Nimin-a a Pisa-a thuthar thehdarhtute a kawmna ah ICT Minister Dr. Vanlalthlana chuan Mizoram Sawrkar chuan chak zawk leh langtlang zawka sawrkar file-te a kal theihna turin eOffice hmang turin January 2024 atang khan hma lak tan thu a sawi a. “A bul tanna (pilot) atan Secreteriat tih hmasak a, chumi zawha Directorate leh District Office-ah te kalpui tura ruahman ni,” a ti a. Hemi atan hian awm ang ang te dapin October 11, 2024 khan Department of Administrative Reforms & Public Grievance (DARPG), Govt. of India hnuaia State Collaborative Initiative Scheme (SCI) atangin cheng vbc. 1.99 hmuh a nih thu leh Ministry of Electronic & IT, Govt. of India chuan kum 3 chhung atan North-East States leh UT (J&K and Ladakh)-te tan eOffice license leh hosting man a tumsak tur thu an dawn thu a sawi bawk.

ICT Minister chuan cheng vbc. 1.99 an hmuh atang hian Computer Set, Printer leh Scanner an lei bakah training leh eOffice kalpuina senso hrang hrang atan hman a nih thu a sawi a, “December ni 10, 2024 khan stakeholders kickoff meeting neih niin eOffice kalpuina tur atana document tul hrang hrangte chu NIC leh Railtel-ah te pek nghal a ni a; eOffice implementation chu Secretariat bik atan chuan bul tan chhoh a lo ni ta a ni,” a ti a, April ni 18, 2025-ah ‘Go-Live’ niin hman tan a lo nih tak thu leh a tirah Secretariat-a Department thlanbik pali, DPAR (GGT), ICT, School Education leh PWD-ten hmang hmasa in tunah chuan, Secretariat-a Department zawng zawng (41) bakah Chief Minister Office (CMO)-ah te hman a ni tawh tih a sawi bawk.

ICT Minister chuan eOffice hmang hian file 6,492 kaltir a niin heng file-te hi vawi 63,565 khawih chet tawh a nih tawh thu pawh sawiin, “File kal hi a chakin a awm reina dawhkan hmuh theih vek a nih avangin tumahin file an kawl rei ngai lo a tih theih. File pawimawhte pawh In lamah leh zinna thlengin a en khawih theih vek a. Hei hi a bikin Minister, Chief Secretary, Secretary leh Senior Officer-ten an hmang tangkai thin hle,” a ti a. “File bo a awm theih tawh lo bakah, file ken kual a awm tawh loh avangin Confidentiality atan pawh a tangkai em em a. Lehkhapuan hman a tlem tawh dawn avangin sawrkarin sum tam tak a hum thei dawn bawk a ni,” a ti bawk. He hunah hian Minister hi ICT changtu Secretary Amit Sharma leh CIO James Lalnunmawia bakah ICT Officer dang ten an tawiawm bawk a ni.