Ruihhlo vanga mipa kiam chak vei thu sawi

Social Welfare Minister Lalrinpuii'n ruihhlo avanga mipa an kiam chak chu veiawm a tih thu a sawi.

Nimin khan Synod Revival Camping Centre, Neihbawi-ah ‘International Day Against Drug Abuse & Illicit Trafficking 2025' pualin hun hman a ni a, he hun hi hmanpuiin Social Welfare Minister Lalrinpuii chuan ruihhlo ngaih chu natna tihdam theih a nih avangin Hulhliap Short Stay Centre-a mithiamte enkawlna hnuaia ruihhlo ngaite awmna tur siam a ni chu lawmawm a tih thu a sawi a, ruihhlo ngai, Centre-a awmte chu insiamthat nana hmang tura chahin, ruihhlo bawih atanga zalenna famkim an chan ngei theih nan duhsakna a hlan bawk a ni.

He hunah hian Excise Minister Lalnghinglova Hmar chu khualzahawm niin Kohhran leh Tlawmngai pawlte tanhona zara Hulhliap Short Stay Centre siam a ni chu lawmawm a tih thu a sawi a, Covid-19 hripui vanglai, sawrkar pawh a chet hleih theih tawh loh hnua Kohhrante hmalakna ang kha ruihhlo do kawngah pawh hmuh leh theih nise a duh thu a sawi bawk.

He hun hi Social Welfare, Women & Child Development Commissioner & Secretary Lalzarmawii chuan kaihruaiin Adviser to CM Lalmuanpuia Punte pawhin a hmanpui a ni.