Mizoram-a ruihhlo hluar chhan State thenawm atanga awlsam taka a rawn luh vang niin sawi

Excise & Narcotics Department-a Commissioner Z. Lalhmangaiha chuan Mizoram-ah ruihhlo a hluar chhan ber chu State thenawma Golden Triangle atanga Mizoram-a awlsam taka ruihhlo a luh vang a ni tih sawiin, kumin ah May ni 31 thleng khan END chuan Heroin kg. 16 leh gram 17 zet an man tawh a ni.

Akashvani News in a kawmnaah END-a Commissioner Z. Lalhmangaiha chuan Mizoram-ah ruihhlo a hluar chhan ber chu State thenawma Golden Triangle atanga Mizoram-a awlsam taka ruihhlo a luh vang a ni tih sawiin, Golden Triangle chu nikumah pawh khawvela Heroin tharchhuak hnem ber an nih thu a sawi a. Chumi atang chuan khawvel hmun hrang hrangah putdarh a nih thu a sawi a. “Mizoram chu Myanmar nena ramri km 510 nei a nih avangin khawi hmunah pawh Sakawr leh Bawng hmang te in an rawn lut thei si a, hei hi Mizoram harsatna ber a ni,” a ti bawk.

Hei bakah hian ruihhlo dona kawngah pawh kawng chi hrang hrangin theihtawp an chhuah thu sawiin, “Kohhran, sawrkar leh NGO te pawhin theihtawp an chhuah,” a ti a. Anni chauhin an do hneh theih loh avangin mipuite tanrual a ngaih thu leh tih tak zeta ruihhlo chu mipui, a te ber atanga a lian ber te'n an do a ngaih thu a sawi a. Ruihhlo do kawngah tha thlah a nih chuan Mizoram dinhmun a thim hle dawn niin a sawi bawk.

Hetihlai hian Excise & Narcotics Department chuan kumin ah May ni 31 thleng khan Heroin kg 16 leh gram 171 zet an man tawh a, heng bakah hian Zu leh ruihna atana hman chi hrang hrang man a ni tawh a. ND&PS Act, 1985 hnuaiah mi 409 man a nih tawh thu leh thubuai 214 ziahluh a ni tawh tih a sawi a. MLP Act 2019 hnuaiah mi 2,422 manin thubuai 2,715 ziahluh a ni tawh bawk a ni.

Tunhnai khan Excise & Narcotics Department changtu Minister Lalnghinglova Hmar chuan Mizoram-ah nikum chhungin Excise and Narcotics Department leh Mizoram Police Department in ruihhlo Heroin kg 127 chuang an man thu a sawi a, Excise & Narcotics Department chuan Heroin hi kg 46 gram 68 an man tih sawiin, Mizoram Police chuan kg 80 gram 81 man thu a sawi bawk a ni.