Kawng pengthuam pathum siam dan tur CM-ah thlen

PWD changtu Minister Vanlalhlana leh PWD-a thawktute chuan nimin khan Chief Minister Lalduhoma hmaah Aizawl khawpui chhung kawngpui pengthuam thenkhat siam dan tur an rawtna an thlen.

Rawtna an thlenna hunah hian PWD Minister Vanlalhlana chuan sawrkar hmasa lamah khan Aizawl pengthuam pawimawh te siam tumna a lo awm tawh thin thu sawiin, “Nimahsela, a man a sangin a lian tham deuh thin. Vawiin a kan rawn ruahman hi chu sum seng tam lutuk lova pengthuam pawimawh pathum siam that tumna a ni,” tiin thuhma a sawi a. Hemi hnu hian an ruahmanna te chu thlirho a ni.

Nimin-a rawtna an thlen ah hian ruahmanna pathum siam niin Bawngkawn pengthuam-ah hmun hnih leh Vaivakawn pengthuam-ah hmun pakhat te a ni a, he huna rawtna an thlena an tarlan danin State Guest House thlanga Chaltlang Road hnuaiah Ramhlun Main Road leh Ramhlun Lower Road te tunnel siamin lei hnuaia inzawm tir a, Bawngkawn Police Station bulah National Highway va zawmtir a ni a. Ramhlun lam atanga National Highway lama kal duhte tan leh National Highway atanga Ramhlun Main Road leh Lower Road-a kal turte tan tuna Traffic point va thleng kher lova kaltir theih tum a ni a, lirthei lian te erawh an kal thei dawn lo thung a. He Project hi cheng vbc. 25 a thawh theih nia ngaih a ni.

An ruahmanna dang leh chu, Bawngkawn Hrangbana Filling Station thlang, Tripper dinna atanga (Viaduct) Leihlawn, Brigade Veng lama dawhkai a ni a. Serchhip By-pass road, Sailiamkawn bula an dawh leihlawn ang chu helai hmunah hian Metre 49 vela sang, metre 150 a sei a dawh theih niin an ngai a. Lei dawh awlsam leh man tlawm nia ngaih a ni a, Brigade veng lamah chuan Greenwood Hospital bul pengthuam velah a chhuak phei ang. He hna hi cheng vbc. 30 vela thawh theih tura ngaih a ni a. Bawngkawn pengthuam hi Aizawl khawpui chhunga pengthuam lun ber a ni a. Chawhrualin nitin lirthei singnga (50000) chuangin an paltlang thin nia chhut a ni.

A ruahman pathumna chu Vaivakawn pengthuam siam a ni a. Vaivakawn junction ruahmanna hi tuna Vaivakawn Bazar sak mai tawh tur nen hian kal kawptir a ngai dawn a. Cultural Centre bulhnai atanga YMA Ground sir deuh chunga leihlawn, Bazar atana hman theih nghal tur dawh phei a, Vaivakawn Bazar-a va innghahtir a ni a, cheng vbc. 40 vela sak theih beisei niin Vaivakawn pengthuam hi chawhrualin nitin lirthei singthum (30000) chuangin an paltlang thin nia chhut a ni bawk.

Heng ruahmanna te hi duan ni mah se, eng sum atangin nge thawh a nih ang tih chu la dap leh tur a ni dawn a, nimin-a thutkhawm ah hian a thawhna tur sum hnar sawi a ni rih lo thung a, a sum dap dan tur erawh chu a thuphungin an sawiho a ni.