MNF-ah hmun a awm reng thu Dr. Thangtea’n a sawi

MNF Sr. Vice President Dr. R. Lalthangliana chuan Mizo hnam hmangaih tak takte tan MNF ah hmun a awm reng tih a sawi.

MNF party in nimin a Aizawl Mizo Hnam Run Chhung Inkhawm an neih ah MNF Sr. Vice President Dr. R. Lalthang-liana chuan Mizo hnam hi MNF dinchhan a ni tih sawiin, “Hnam lungphum nghet tak chunga ding, ram leh hnam hmangaihtute luankhawmna chu MNF hi a ni. Zofate Inpui zalenna meichher chhitu kan ni a. He meichher hi a mit tur a nilova, thangthar lo chhuak zel turten kan chhawmnun zel a pawi-mawh em em a. Mizo hnam hmangaih tak takte tan MNF-ah hmun a awm reng a ni,” a ti a. India ramah Peace Accord ziah a lo ni nual tawh tih pawh sawiin, “Heng zinga hlawhtling ber chu ‘Mizoram Accord June ni 30, 1986’ hi a ni,” a ti.

He inremna, Memorundam of Settlement hian Zofate tan rahchhuah tha tamtak a neih thu pawh sawiin, “Bill No 89 of 1986-ah, Constitutional Amendment 53, Article 371(G) dah belhin, Mizoram chu Statehood-a puan kan ni a. Guwahati High Court, Aizawl Bench chu July 5, 1990 ah hawn a ni a. Central University (MZU) chu July ni 2, 2001 ah hawn a ni a. Kum 2004-ah India/Mizoram leh Myanmar Border Trade Zokhaw-thar-ah hawn a ni a. State danga awm ve lo, kan Sakhaw humhim tlat theihna telh a ni,” a ti bawk.

MNF Sr. Vice President chuan, zalenna sual anih hnuah hnamdang ngaihsanna thuk taka lo awm tawh chu thlak danglam dawrh a nih thu pawh sawiin, “Mizote khawvel hriata hnam zahawma min phochhuaktu, ram leh hnam anga kan dinchhuahna atana bultantu, Mizo Nationalism meichher min chhitsaktu kan hruaitute leh nunna hial hlantute zahna chibai kan buk thar leh a. Inremna thuthlungin a tha zawnga nghawng chhuah a neih zel hi MNF in a ngaih pawimawh te zinga mi a ni,” a ti bawk.