Kum 10 chhungin ZPDS, Tanhril-in Artui 33,61,320 leh Ar note 21,24,869 an thar tawh

Zoram Poultry Development Society hnuaia Tanhril-a INDBRO Poultry Hatchery Farm-ah kum 2015 atangin Artui 33,61,320 tharchhuah ni tawhin Ar note 21,24,869 tharchhuah a ni tawh bawk.

Zoram Poultry Development Society hnuaia INDBRO Poultry Hatchery Farm hi May ni 18, 2015 khan AH & Vety Department Farm ‘Regional Broiler Chick Farm’ Tanhril awm thinna ah din a ni a, an kum 10 tlin lawmna chu Zirtawpni khan neiin niin he huna tarlan anih danin Tanhril-a INDBRO Poultry Hatchery Farm hi a bultanna atan NABARD RIDF (XVII) 2012 leh RKVY sum hmangin kar khatah Ar note 20,000 thar thei tur a din niin NABARD RIDF (XXVI) 2020-21 sum leh SASCI 2021-2022 sum hmanga tihchangtlun a nih leh hnuah kar khat ah Ar note 40,000 ve ve thar theihna tur a tihlen a ni leh a, tunah hian kar khat ah Ar note 1,00,000 thar theihna khawl a awm mek a ni.

ZPDS, Tanhril hi Member pasarih awmna, ZPDS Governing Body-in an enkawl a, a hmunah hian thawktu 16 an awm mek a, Artui tihkeuna leh arte enkawlna khawl hrang hrang bun a ni a, chungte chu Artui awp lumna khawl Setting machine-te, Artui awp keuna khawl Hatching Machine-te, Breeder House, Grower House, Slaughter House leh Egg Storage Room-te an ni.

Kum 2015 atanga 2025 thleng khan ZPDS-ah hian Artui 33,61,320 tharchhuah a ni tawh a, kum 2024 kha Artui tharchhuah tam ber kum niin Artui 5,86,362 tharchhuah a ni a. Kum 2016 atangin Brown Layer, Rainbow Rooster leh Broiler note tharchhuah tan a ni a, kum 2025 thleng hian Ar note 21,24,869 tharchhuah tawh a ni bawk.

Inrinni-a ZPDS, Tanhril kum 10 tlin lawmna hun hi AH&Vety Minister C. Lalsawivunga chuan hmanpuiin ram hmasawnna tehfung pawimawh tak chu kawng hrang hranga intodelh a nih thu leh chung zingah chuan ei leh bara intodelh hi a pawimawh hle thu a sawi a. Artui leh arsa chu mihring hriselna atana pawimawh tak a nih angin intodelhna tluantling nei tur chuan ZPDS chuan hmabak thui tak a la neih thu a sawi a. Ranvulhtute mamawh pawimawh tak chu ran chaw tha, mamawh ang tawk neih a nih thu sawiin, chumi tihlawhtling tur chuan Mizoram hmun hrang hrangah ranchaw chinna turin ruahmanna siam mek a nih thu a sawi bawk.