Mizoram-ah Oil Palm hriak thlitfimna bun tum

Sawrkar Laipuiin hriak ei chi (Edible Oil) a intodelhna tura hma a lakna kalzelah Mizoram-ah pawh hriak thlitfimna hmunpui, Oil Refinery din a ni dawn tih Godrej Agrovet Ltd. Mizoram hruaituten an sawi.

Sawrkar laipuiiin Oil Palm Scheme a kalpui mek a, Mizoram-ah pawh Oil Palm Scheme hi kum 2005 atang khan kalpui niin, hmun thenkhatah loneitu ten hlawhtlinpui lo mahse, Kolasib leh Mamit District-a Oil Palm chingtute chuan an hlawhtlinpui hle a, hei vang hian Mizoram hmundangah pawh Oil Palm Scheme hi tharthawh leh tura hmalak mek a ni a.Kolasib leh Mamit District-a Oil Palm Scheme kalpuitu Godrej Agrovet Ltd. te chuan nikum chhung khan loneitute tharchhuah FFB (Oil Palm rah) Metric tonne 5335, cheng nuai 700 man vel an leisak a, kumin ah hian cheng nuai 900 man vel lei theih an beisei a. Oil Palm an lei te hi kum 2014 atang khan Bukvannei-a Oil Palm Mill-ah herin, kumtin Oil Palm hriak (Cride Palm Oil) thahnem tak State pawnah an thawnchhuak thin a ni.

Godrej Agrovet Ltd te chuan hetianga Mizoram loneitute tharchhuah atanga Oil Palm hriak an her te chu a thartu Mizoram mipui ten an ei theih nan kumin chhung ngeiin Kolasib District-ah Oil Palm hriak thlitfimna (Palm Oil refinery) din an tum thu sawiin, hei bakah hian Oil Palm Farmer ten an thlai enkawlna atana an mamawh hrang hrang te man tlawm leh awlsam zawka an hmuh theih nan an inbuatsaih mek thu an sawi bawk.