YMA Inkhawmpui Lian neih hun tur ruat fel

Kumin-a YMA Inkhawmpui Lian neih tur chu October 21-23, 2025 chhung khian neih a ni dawn.

Nizan hmasa khan Central YMA Executive Committee (CEC) chu Central YMA Committee Room-ah thukhawmin kumin-a YMA Inkhawmpui Lian vawi 75-na neih hun tur an sawiho a, Sakawrdai-a YMA Inkhawmpui Lian vawi 75-na neih hun atan October 21-23,2025 ruatin Inkhawmpui Programme Committee din nghal a ni bawk a, Chairman-ah Central YMA Vice President Prof. Lalnuntluanga ruat a ni a, Kumpuan Thupui sawi turin General Secretary Prof. Malsawmliana ruat a ni bawk. Heng bakah hian kumtin-a Group leh Branch inelna neih thin - Kumpuan bawhzui tha, Ramngaw leh nungcha humhalh tha, luidung humhalh tha, Branch chanchinbu tha leh YMA Chanchinbu la tha te buatsaih leh tum a ni bawk.

He Meeting hian July 19, 2025-ah OKM Home, Phunchawng-ah Free Health Clinic buatsaih an rel a; Assam-a Barak Valley huamchhunga YMA Branch ding thar 4 pawm a ni bawk a Central YMA in Direct in a awp dawn a ni.