Serchhip-a END leh MJA Member te an inkawm

Serchhip-a Excise & Narcotics Department hotute leh Serchhip District MJA Member te chu nimin khan inkawmin hmalakna leh thawhhona tur hrang hrang an sawiho.
Serchhip-a Excise & Narcotics Department hotute hian nimin khan MJA Member te hi an Pisa-a leng-ah sawmin an inkawm a, he hunah hian Serchhip-a Asst. Commissioner of END MS. Dawngkima chuan an hmalakna thenkhat leh tunhnaia harsatna an neih te a tarlang a. END Serchhip Station-a OC thar R. Lalrinsanga pawhin an Department chu Department lian a ni lo tih sawiin, an hmalakma te puanzarna leh mipuite zirtirna kawngah Media te nen thawhhona tha tak an lo neih tawh chu chhawmnun zel a pawimawh thu a sawi bawk.

Anni bakah hian SI B. Lalengmawia chuan tunhnaia an hmalakna leh an dinhmun tlangpui te sawiin, tunah hian thawktu 34 an awm mek thu leh Zu leh ruihhlo manchhuahna kawnga an hmalak dan te a tarlang a, tunhnaiah Zan lama Duty pangngai bakah chhun lama Duty ten zan lamah khawlai dung fanga hma an lakna te a tarlang bawk a ni.

He hunah hian MJA Member te pawhin END Serchhip ten thawhhona tha neih duha MJA Member te leng-a an sawm chu lawmawm an tih thu sawiin, thawhhona tha neih zel an duh thu leh an hmalakna ah tangkaina an neih ah te an inhuam thu an sawi bawk a. Hmalakna tura pawimawh nia an hriat te an sawiho bawk a ni.